Shtetet e Bashkuara i kanë dërguar Iranit një plan me 15 pika për t’i dhënë fund luftës në Lindjen e Mesme, raporton “New York Times”, duke iu referuar dy zyrtarëve me njohuri rreth zhvillimeve diplomatike, që reflekton gatishmërinë e administratës Trump për të gjetur një rrugëdalje nga konflikti ndërsa përballet me pasojat ekonomike të tij

Plani raportohet se është dërguar përmes Pakistanit, por nuk është e qartë nëse ka gjasa që Irani ta pranojë planin si bazë për bisedime ose nëse Izraeli është pjesë e propozimit

Nuk është e qartë as nëse Izraeli, i cili ka bombarduar Iranin së bashku me Shtetet e Bashkuara, ishte dakord me propozimin.

Megjithatë, dorëzimi i planit tregoi se administrata po shtonte përpjekjet për t’i dhënë fund luftës, tashmë në javën e saj të katërt, e cila ka përfshirë edhe disa vende të tjera.

Gazeta thotë se nuk ka parë një kopje të planit, por zyrtarët, të cilët folën në kushte anonimiteti ndanë disa nga vijat e tij të përgjithshme, duke thënë se ai trajton programet balistike dhe bërthamore të Iranit.

Izraeli dhe Shtetet e Bashkuara kanë shënjestruar raketat balistike të Iranit, lëshuesit dhe objektet e prodhimit të tyre, si dhe programin e tij bërthamor në fushatën e bombardimeve që filloi më 28 shkurt.

Udhëheqësit amerikanë dhe izraelitë janë zotuar se nuk do të lejojnë kurrë që Irani të zotërojë armë bërthamore.

Plani gjithashtu trajton rrugët detare, tha një nga zyrtarët. Që nga fillimi i luftës, Irani në mënyrë efektive ka bllokuar shumicën e anijeve perëndimore që të kalojnë në mënyrë të sigurt përmes Ngushticës së Hormuzit, një rrugë ujore strategjike për hyrje dhe dalje nga Gjiri Persik, duke ndërprerë furnizimin global me naftë dhe gaz natyror dhe duke çuar në rritje të menjëhershme të çmimeve.