Humbja turpëruese 6-0 e Santos ndaj Vasco da Gama ka ndezur një shpërthim të fortë nga Neymar, i cili nuk kurseu aspak kritikat për shokët e skuadrës.
33-vjeçari, që u rikthye te klubi i tij i fëmijërisë në janar pas largimit nga Al Hilal, u largua nga fusha me lot në sy, ndërsa më pas në intervistë e quajti performancën e Santos një “disfatë të turpshme”.
Në ndeshjen e zhvilluar në Estádio do Morumbi, ish-ylli i Barcelonës dhe PSG-së deklaroi për mediat braziliane:
“Jam totalisht i zhgënjyer. Tifozët kanë të drejtë të protestojnë në çdo mënyrë – pa dhunë fizike, por duke sharë dhe ofenduar sot ishte më se e pranueshme. Jam i turpëruar, nuk kam përjetuar kurrë diçka të tillë. Po qaj nga zemërimi.”
Neymar shënoi vetëm 3 gola në 11 paraqitje që kur u kthye te Santos, ndërsa dëmtimet e kanë penguar vazhdimisht. Situata e rëndë në klub, që aktualisht është vetëm dy pikë mbi zonën e rënies nga kategoria, çoi edhe në shkarkimin e trajnerit Cleber Xavier.
Por kritikat e Neymar nuk ndaluan me kaq:
“Për ta përmbledhur: ishte m***. Është turp të luash një ndeshje të tillë me fanellën e Santos. Secili duhet të ulet, të reflektojë dhe të vendosë çfarë do të bëjë. Me këtë qasje që patëm sot, nuk ka kuptim të dalim as në fushë të mërkurën.”
Santos do të përpiqet të rikthehet në shina më 24 gusht, kur përballet në transfertë me Bahia. /GazetaExpress/
