Ylli brazilian Neymar ka reaguar ashpër ndaj spekulimeve rreth gjendjes së tij fizike, pasi mungoi në barazimin 2-2 të Santosit kundër Mirassolit.

Sulmuesi 34-vjeçar nuk u përfshi në skuadër për shkak të një programi të menaxhimit të ngarkesës fizike, gjë që nxiti shumë spekulime në media dhe rrjete sociale.

Në një reagim në rrjetet sociale, Neymar e shprehu hapur frustrimin e tij për atë që e quajti histori të shpikura mbi gjendjen e tij, shkruan “Gazeta Express”.

“Shumë njerëz po krijojnë teori për atë që po ndodh me mua: nuk po ndodh asgjë. Nëse luaj i dëmtuar jam gabim, nëse mendoj për veten jam gabim, nëse ndalem për t’u kujdesur për trupin jam gabim. Është shumë e vështirë të jesh unë”, u shpreh braziliani.

Mungesa e tij erdhi në një moment delikat, pasi trajneri i kombëtares së Brazilit, Carlo Ancelotti, ishte në stadium për ta ndjekur ndeshjen dhe për ta vlerësuar formën e tij përpara miqësoreve të marsit dhe përgatitjeve drejt Kupës së Botës 2026.

Pa Neymarin, protagonisti i ndeshjes ishte Gabigol, i cili i shënoi dy gola në minutat e fundit për t’ia dhënë një pikë Santosit.

Braziliani vazhdon të jetë nën vëzhgim të madh pasi rikthimi i tij në fushë vjen pas një periudhe të gjatë dëmtimesh, që filloi me këputjen e ligamentit të gjurit në vitin 2023.

Klubi dhe stafi mjekësor po i menaxhojnë me kujdes minutat e tij për ta shmangur një rikthim të problemeve fizike.

Megjithatë, për Neymarin mbetet ende një shans për ta bindur trajnerin e Brazilit në ndeshjen e ardhshme kundër Corinthians, që mund të jetë prova e fundit për të treguar se është gati për një tjetër aventurë me “Seleção”. /Gazeta Express