Lajme surprizuese po vijnë nga Turqia, ku Fenerbahçe raportohet se po shqyrton seriozisht mundësinë për të transferuar një nga yjet më mediatikë të futbollit botëror: Neymar Jr. Sipas të përditshmes turke Fanatik, skuadra e drejtuar nga José Mourinho ka në plan të realizojë një operacion të madh për ta sjellë brazilianin në Stamboll për sezonin e ardhshëm – një lëvizje që do të trondiste tregun europian të transferimeve.

Aktualisht, Neymar është pjesë e Santos në Brazil, me kontratë të vlefshme deri në fund të vitit 2025. Megjithatë, kontrata përmban një klauzolë që i lejon largimin pa asnjë kosto nëse merr një ofertë nga një klub europian – pikërisht mundësia që Fenerbahçe kërkon të shfrytëzojë.

Projekti ambicioz i skuadrës turke, me Mourinhon në krye, përfshin afrimin e emrave të mëdhenj, dhe Neymar do të ishte figura ideale për këtë vizion. Transferimi i tij nuk do të kishte ndikim vetëm në fushën e lojës, por edhe në aspektin global të imazhit dhe marketingut të klubit.

Oferta e Fenerbahçes parashikon një kontratë për një sezon me opsion për zgjatje edhe për një vit tjetër. Edhe pse gjithçka është ende në fazën fillestare, entuziazmi në Stamboll po rritet, ndërsa merkatoja e verës mund të jetë vendimtare për t’u parë nëse kjo ide do të bëhet realitet apo do të mbetet vetëm një spekulim./GazetaExpress/