Portieri i Barcelonës, Marc-André ter Stegen, sipas situatës aktuale rrezikon ta humbasë Kampionatin Botëror 2026. Pozita e portierit titullar të Gjermanisë ishte e destinuar për të, pasi do të ishte turneu i parë madhor pas pensionimit të Manuel Neuerit, por humbja e vendit të titullarit te Barcelona e ka vënë këtë në pikëpyetje.

Ter Stegen mungoi katër muajt e parë të sezonit për shkak të një dëmtimi, pas operacionit në shpinë, por tashmë është rikthyer në formë. Megjithatë, trajneri i Barcelonës, Hansi Flick, ka qenë i qartë se Joan Garcia mbetet zgjedhja e tij numër një.

Më herët gjatë vitit, përzgjedhësi i Gjermanisë, Julian Nagelsmann, kishte bërë të ditur se zgjedhja e tij e parë ishte ter Stegen, por vetëm nëse ai luan rregullisht për ta ruajtur këtë status. Këtë javë, drejtori sportiv Rudi Völler e ka përsëritur këtë mesazh për Kicker, siç raporton Sport.

“Nuk ka rëndësi nëse ai qëndron te Barcelona apo shkon diku tjetër, në fund ai duhet të luajë. Dhe atëherë të gjithë do të jemi të lumtur për të, nëse pas shumë vitesh si portier i nivelit botëror në hijen e Manuel Neuerit, i jepet mundësia të jetë mes shtyllave në një Kupë Bote.”

“Marc ka qenë në kontakt shumë të ngushtë me trajnerin tonë të portierëve, Andreas Kronenberg, prej muajsh. Ende mund të mbetet pak e hapur situata, sepse shumëçka varet nga Marc-André dhe nga ajo që do të ndodhë me të. Oliver Baumann po bën shumë mirë deri tani, por ekziston opsioni i Marc-it dhe duhet ta ndjekim nga afër situatën.”

Pavarësisht se agjenti i tij thuhet se ka nisur të kërkojë destinacione të mundshme për një huazim në janar, lajmet e fundit janë se ter Stegen nuk ka ndërmend të largohet nga Barcelona. Kjo mund të lidhet edhe me faktin se ai aktualisht është i përfshirë në një betejë ligjore për kujdestarinë dhe dëshiron të qëndrojë në Barcelonë pranë fëmijëve të tij.