Raportime nga Kroacia sugjerojnë se Dino Klapija, një talent 18-vjeçar i RB Leipzig që aktualisht luan për ekipin U19 të SHBA-së, po synohet nga Kosova për t’iu bashkuar kombëtares së tyre.

“Ish-lojtari i Kustošijes, Dino Klapija (18), ka vendosur që në karrierën e tij të përfaqësojë Kombëtaren e Kosovës”, shkruan mediumi kroat “tportal.hr”.

"Edhe pse në kategoritë e reja ka veshur fanellën e Kroacisë dhe të Shteteve të Bashkuara të Amerikës, vendin ku ka lindur, sulmuesi i RB Leipzigut, Dino Klapija, në të ardhmen do të përfaqësojë Kombëtaren e Kosovës. Kjo ende nuk është zyrtarizuar, por pritet të bëhet zyrtare së shpejti. Federata e Futbollit të Kosovës thuhet se e ka pothuajse të përfunduar marrëveshjen me Klapijën", thuhet në raportimin e "SportSport".

Klapija shpërndau një postim nga Federata e Futbollit e Kosovës (FFK) pas fitores së fundit të Kosovës kundër Suedisë, gjë që u interpretua nga shumëkush si një sinjal i mundshëm i interesit të tij për t’u bashkuar me ekipin.

Ndërsa aktualisht përfaqëson SHBA-në në nivelin U19, Klapija është mund të luajë për disa kombëtare për shkak të prejardhjes së prindërve të tij, përfshirë Bosnjën dhe Hercegovinën, Shqipërinë, Kosovën dhe Malin e Zi. Ai më parë ka përfaqësuar Kroacinë në nivelin U17.

Klapija u transferua te Leipzigu në janar të vitit 2024 nga Kustosija për shumën e tri milionë eurove./GazetaExpress/