Sergio Ramos mund të rikthehet te klubi i zemrës në një rol krejtësisht të ri. Sipas radios prestigjioze spanjolle COPE, mbrojtësi legjendar ka paraqitur një ofertë zyrtare për blerjen e Sevillës, klubit ku ai u formua si futbollist.

Raporti thekson se Ramos nuk vepron i vetëm: ai kryeson një grup investitorësh, të cilët kanë dorëzuar ofertën më të madhe deri tani për të marrë në pronësi klubin andaluzian. Projekti udhëhiqet personalisht nga vetë Ramos, çka e bën këtë iniciativë edhe më domethënëse për tifozët e Sevillës.

Burimi shton se ditët në vijim do të jenë vendimtare, pasi pronarët aktualë të klubit po shqyrtojnë ofertën dhe do të vendosin nëse do ta pranojnë apo jo këtë propozim të konsiderueshëm financiar.

Nëse ky zhvillim konkretizohet, do të ishte një kthesë historike për Sevillën dhe një hap i madh për Sergio Ramos, i cili mund të kalojë nga legjendë në fushë në lider institucional i klubit ku nisi gjithçka.

Për momentin, mbetet për t’u parë reagimi zyrtar i Sevillës dhe nëse kjo lëvizje do të shndërrohet në realitet. /GazetaExpress