Prokuroria Speciale e Kosovës ka ngritur sot aktakuzë në Departamentin Special të Gjykatës Themelore në Prishtinë kundër të pandehurës F.D për veprën penale të organizimit dhe pjesëmarrjes në grupin terrorist ISIS

Përmes një komunikate për media, Prokuroria Speciale bën të ditur se e dyshuara kishte shkuar në Siri ku i është bashkangjitur bashkëshortit të saj, i cili vepronte në kuadër të grupit terrorist, ISIS.

“Prokuroria Speciale njofton se e pandehura F.D, më 22 shtator 2014, me qëllim që të marrë pjesë në veprimtarinë e grupeve terroriste, ISIS, në Siri, duke vepruar me dashje dhe dijeni për veprimet e veta, nga Prishtina është nisur në drejtim të pikës kufitare të Hanit të Elezit, ku nga aty është larguar nga Kosova dhe nga Aeroporti i Shkupit ka udhëtuar drejtë Stambollit. Më tutje ka vajtur në Siri ku i është bashkangjitur bashkëshortit të saj, i cili vepronte në kuadër të grupit terrorist, ISIS”, thekson Prokuroria Speciale përmes një komunikate.

Me këto veprime e pandehura F.D ka kryer veprën penale “Organizimi dhe pjesëmarrja në grup terrorist”, transmeton Klan Kosova.

Gjatë ditës janë ngritur aktakuza edhe ndaj dy kosovareve të tjera që u bën pjesë e Shtetit Islamik.