Një vit e gjysmë pasi Marius Borg Høiby u arrestua nga policia për një episod të dhunshëm në banesën e një gruaje në Oslo, djali i princeshës së kurorës së Norvegjisë po del në gjyq në një nga çështjet më të mëdha që ka shkuar në gjykatë prej vitesh.

Høiby akuzohet për 38 akuza, përfshirë katër raste përdhunimi, në një nga proceset më të mëdha gjyqësore në Norvegji.

Siç shkruan BBC, gjyqi shtatë-javor hapet të martën në gjykatën e distriktit të Oslos.

Në prag të gjyqit, doli se 29-vjeçari ishte ndaluar sërish, në rrethana të ngjashme me arrestimin e parë, nën dyshimin për sulm, kërcënime me thikë dhe shkelje të urdhrit të mbrojtjes (lexo këtu).

Policia e ka vendosur në paraburgim për katër javë, ndaj ai e nis gjyqin në burg. Ekipi i mbrojtjes synon të apelojë vendimin.

Ndërkohë, nëna e tij, princesha e kurorës Mette-Marit po përballet me kritika të ashpra pasi u zbulua se ishte përmendur në qindra email-e që tregonin kontakte të gjera me të dënuarin për krime seksuale Jeffrey Epstein, i cili vdiq në burg në vitin 2019. Ajo ka pranuar se ka treguar “gjykim të dobët” lidhur me marrëdhënien e saj me Epstein-in, por pasojat tashmë kanë nisur, me një organizatë që e ka hequr si patrone për çmimin e saj vjetor.

Kthehemi tek Marius Borg Høiby. Gjykata ka vendosur kufizime të rënda, duke ndaluar çdo foto të tij brenda ose jashtë gjykatës. Gjithashtu ndalohet publikimi i çdo detaji që mund të identifikojë katër gratë që pretendohet se ai ka përdhunuar.

Familja mbretërore nuk do të marrë pjesë në seancat në sallën 250 të gjykatës së Oslos, ku gjyqi ka tërhequr interes të madh në Norvegji dhe jashtë saj.

Komentuesit nuk e shohin këtë si të habitshme, me Mbretin Harald V dhe Mbretëreshën Sonja që do të udhëtojnë drejt Lojërave Olimpike Dimërore në Itali këtë javë.

Marius Borg Høiby lindi katër vite para se Mette-Marit të martohej me princin e kurorës dhe, megjithëse shihet si pjesë e afërt e familjes, ai nuk është pjesë e familjes mbretërore zyrtare dhe as figurë publike.

Ai përballet me një sërë akuzash që përfshijnë:

-përdhunim ndërsa një grua ishte pa ndjenja (tetor 2023)

-tre raste përdhunimi ndaj grave të paafta (dhjetor 2018, mars 2024, nëntor 2024)

-gjashtë raste sjelljeje seksuale pa pëlqim, përfshirë filmimin e viktimave

-shkaktim dëmtimesh trupore

-abuzim i përsëritur ndaj partneres aktuale ose ish-partneres me kërcënime, dhunë ose detyrim

-shkelje e urdhrit të mbrojtjes

-transportim i 3.5 kg marijuanë

-tejkalim shpejtësie

Disa nga akuzat për abuzim dhe kërcënime në gusht 2024 lidhen me një grua nga zona Frogner e Oslos perëndimor, dhe besohet se arrestimi i fundit lidhet gjithashtu me të.

Ekipi i mbrojtjes ka thënë se ai mohon shumicën e akuzave, veçanërisht ato për abuzim seksual dhe dhunë. Borg Høiby ka pranuar disa shkelje më të vogla dhe pas arrestimit fillestar pranoi dhunë fizike dhe shkatërrim objektesh.

Ai pritet të dëshmojë për herë të parë të mërkurën. Nëse shpallet fajtor, mund të dënohet me të paktën 10 vite burg.