Prince Andrew ka kërkuar zyrtarisht t’i japë fund kontratës së qirasë për East Lodge, një pronë e Crown Estate në Berkshire, duke hequr dorë nga një tjetër marrëveshje pas largimit nga Royal Lodge.

Dokumentet e siguruara nga BBC tregojnë se Andrew Mountbatten-Windsor paguante një qira vjetore prej rreth 13,000 £ për East Lodge, e cila ndodhet rreth pesë milje larg Royal Lodge në Windsor. Prona, një vilë e listuar në Gradën II, besohet se është përdorur për akomodimin e stafit.

East Lodge ndodhet pranë Sunninghill Park, ish-rezidenca e Andrew deri në vitin 2004, përpara se ai të transferohej në Royal Lodge. Shitja e Sunninghill Park në vitin 2007 për 15 milionë paund shkaktoi polemika, pasi prona u ble për një shumë 3 milionë paund mbi çmimin e kërkuar nga dhëndri i presidentit të Kazakistanit.

Vitin e kaluar, Andrew njoftoi se do të largohej nga Royal Lodge dhe do të zhvendosej në Sandringham, në sfondin e polemikave lidhur me marrëdhënien e tij me financierin amerikan Jeffrey Epstein, për të cilin ai ka mohuar çdo shkelje.

Ndërkohë, kontratat e qirasë për prona mbretërore të dhëna nga Crown Estate pritet të shqyrtohen nga Komiteti i Llogarive Publike në Parlamentin britanik. Kryetari i komitetit, Sir Geoffrey Clifton-Brown, ka deklaruar se hetimi synon të rrisë transparencën dhe të sigurojë vlerë për taksapaguesit.

Sipas dokumenteve, Andrew mori fillimisht qiranë e East Lodge në shkurt të vitit 1998, me një pagesë vjetore prej 3,500 £, shumë që më pas u rrit ndjeshëm./TCH