Kancelari i Gjermanisë, Friedrich Merz, synon të ndalojë praktikën që u lejon punonjësve të deklarohen të sëmurë pa vizituar mjekun, në përpjekje për të frenuar rritjen e mungesave në punë.

Partia e tij, Christian Democratic Union (CDU), votoi unanimisht në kongres për t’i dhënë fund kësaj praktike, me argumentin se niveli i lartë i mungesave po dëmton ekonominë.

Që nga fillimi i pandemisë Covid-19, punonjësit në Gjermani kanë pasur mundësi të marrin deri në pesë ditë leje me pagesë të plotë vetëm me një telefonatë në një klinikë mjekësore. Nëse propozimi i CDU-së miratohet, punonjësit do të duhet të paraqiten fizikisht te mjeku përpara se të shpallen të paaftë për punë.

Sipas të dhënave, gjermanët marrin mesatarisht 15 ditë leje mjekësore në vit. CDU argumenton se lehtësia për të siguruar një vërtetim mjekësor ka ndikuar në rritjen e vendimeve për të marrë leje. Për krahasim, në Britaninë e Madhe mesatarja e ditëve të mungesës nga puna në vitin 2024 ishte 4.4 ditë.

Gjermania ka një nga sistemet më bujare të mbrojtjes sociale në botë, duke lejuar deri në 41 ditë leje të paguara nga punëdhënësit para se pagesat të kalojnë te siguruesit. Instituti i Ekonomisë (IW) ka vlerësuar se mungesat për shkak sëmundjeje u kushtojnë punëdhënësve gjermanë rreth 82 miliardë euro në vit.

Propozimi pritet të ngjallë debat të gjerë, mes shqetësimeve për ndikimin në të drejtat e punonjësve dhe nevojës për të mbështetur ekonominë. /Panorama