Barcelona po monitoron me kujdes tregun e transferimeve në përpjekje për të përforcuar repartin defensiv, pas dëmtimit të Andreas Christensen. Megjithëse alternativat nuk mungojnë, gjendja financiare e klubit katalanas e kufizon ndjeshëm hapësirën e manovrimit, duke e bërë huazimin opsionin më realist.

Një nga emrat që po ndiqet është Joao Cancelo, i cili aktualisht aktivizohet te Al Hilal. Mbrojtësi portugez kishte luajtur më parë si i huazuar te Barcelona, përpara se të transferohej në Arabinë Saudite në verën e vitit 2024, por eksperienca e tij atje nuk ka qenë pozitive.

Sipas raportimeve nga Diario SPORT, Cancelo nuk është më pjesë e planeve të trajnerit Simone Inzaghi për sezonin e ardhshëm. Vetë lojtari është i pakënaqur me situatën në Arabinë Saudite dhe dëshiron rikthimin në Evropë, me synimin për t’u përgatitur sa më mirë për Kupën e Botës 2026.

Barcelona e vlerëson Cancelo-n për përvojën, cilësinë teknike dhe fleksibilitetin e tij në mbrojtje, megjithatë ai nuk është prioritet absolut në listën e përforcimeve. Pengesa kryesore mbetet marrëveshja me Al Hilal, pasi lojtari ka kontratë deri në vitin 2027 dhe klubi saudit nuk pritet ta lërë të largohet lehtë.

Situata bëhet edhe më e ndërlikuar për katalanasit për shkak të interesimit nga disa klube të Premier League, të cilat kanë mundësi financiare më të mëdha për të plotësuar kërkesat e Al Hilal. Për këtë arsye, shanset e Barcelonës për të siguruar shërbimet e Cancelo-s mbeten të vogla, por pista mbetet e hapur nëse kushtet bëhen më të favorshme. /GazetaExpress