Një muaj më parë, Børge Brende intervistoi Presidentin e SHBA-së Donald Trump pas fjalimit të tij para udhëheqësve të qeverisë dhe biznesit në Davos të Zvicrës.

Të enjten, presidenti dhe CEO i Forumit Ekonomik Botëror, i cili organizon takimin vjetor në alpet zvicerane, njoftoi se po jepte dorëheqjen pas një hetimi të pavarur mbi marrëdhënien e tij me abuzuesin seksual të ndjerë Jeffrey Epstein.

Dorëheqja e Brende është e fundit në një varg largimesh të profilit të lartë të lidhura me publikimin e të ashtuquajturave dosje Epstein, një koleksion prej miliona emailesh dhe dokumentesh të tjera që detajojnë aktivitetet e financierit abuzues, shkruan CNN, transmeton Gazeta Express.

"Pas shqyrtimit të kujdesshëm, kam vendosur të jap dorëheqjen si President dhe CEO i Forumit Ekonomik Botëror", tha Brende, një ish-ministër i jashtëm norvegjez, në një deklaratë.

"Koha ime këtu, që përfshin 8 vjet e gjysmë, ka qenë thellësisht e dobishme”.

Forumi nisi shqyrtimin e pavarur në fillim të këtij muaji kur doli në pah se Brende kishte marrë pjesë në tre darka biznesi me Epstein në vitet 2018 dhe 2019, si dhe kishte komunikuar me të nëpërmjet email-eve dhe mesazheve me tekst.

Email-et tregojnë se të paktën një nga darkat u zhvillua në shtëpinë e Epstein në New York, vetëm disa javë para se financuesi të arrestohej me akuza federale për trafikim seksual të fëmijëve.

Në një deklaratë në fillim të këtij muaji, pasi WEF nisi hetimin e tij, Brende tha se kishte qenë "plotësisht i pavetëdijshëm për të kaluarën dhe aktivitetet kriminale të Epstein" dhe nuk do të kishte komunikuar ose marrë pjesë në darka me të nëse do ta dinte.

"E pranoj që mund të kisha kryer një hetim më të plotë mbi historinë e Epstein dhe më vjen keq që nuk e bëra këtë", shtoi ai.