Tottenham do të përfitojë 10 milionë euro nëse Fiorentina e bën të përhershëm transferimin e Manor Solomon në fund të sezonit, por ardhja e anësorit izraelit ka shkaktuar një protestë politike në Firence.
Fiorentina njoftoi të premten transferimin e Solomon nga Tottenham në formë huazimi.
Marrëveshja përfshin një opsion blerjeje dhe, sipas “La Gazzetta dello Sport”, shuma për ta blerë përfundimisht 26-vjeçarin është 10 milionë euro.
Solomon e kaloi pjesën e parë të sezonit 2025-26 i huazuar te Villarreal, ku shënoi një gol dhe dhuroi një asist në gjashtë paraqitje në La Liga.
Fiorentina ndodhet tashmë nën presion, duke qenë në fund të tabelës me vetëm një fitore në Serie A këtë sezon, dhe përforcimi i parë i janarit ka shtuar shqetësime, të paktën jashtë fushës.
Disa tifozë të Fiorentinës kanë reaguar në rrjetet sociale duke protestuar kundër nënshkrimit të Solomon, duke postuar komente kritike në njoftimet zyrtare të klubit në “Instagram” dhe “Facebook”.
Pakënaqësia e tifozëve u përforcua edhe nga politikani i majtë lokal Jacopo Madau, këshilltar për Kulturën në Sesto Fiorentino, një qytet në periferi të Firences.
“Nuk je i mirëpritur në Firence,” shkroi Madau.
“Ardhja e futbollistit izraelit Solomon sapo u bë zyrtare. I fundit apo jo në renditje, kushdo që nuk e ka fshehur kurrë mbështetjen për politikat gjenocidale të Netanyahut nuk është i mirëpritur në Firence dhe nuk mund të përfaqësojë qytetin tonë apo Fiorentinën”, shkruan ai./GazetaExpress/
