Një homazh për Diogo Jota u mbajt para të gjitha ndeshjeve të Premier League gjatë fundjavës, përfshirë edhe atë mes Nottingham Forest dhe Brentford.

Nottingham Forest ka lëshuar një deklaratë pasi pamjet e një tifozi që ndërpreu momentin e një minute të heshtjes për Diogo Jota qarkulluan në internet pas fitores së tyre ndaj Brentford.

Klubet e Premier League kishin rënë dakord që të mbahej një minutë heshtje para të gjitha ndeshjeve të javës së parë, në nderim të Diogo Jota dhe vëllait të tij Andre Silva, të cilët humbën jetën në një aksident trafiku në veriun e Spanjës më 3 korrik.

Ish-sulmuesi i Liverpool dhe Wolves, Jota, ndërroi jetë në moshën 28-vjeçare, bashkë me vëllain e tij 25-vjeçar. Lojtarët në mbarë Premier League gjatë fundjavës mbanin shirita të zinj në krah, ndërsa të gjitha ekipet respektuan një minutë heshtje në kujtim të tyre.

Por te “City Ground” pati polemika pasi një tifoz u duk se ndërpreu heshtjen e planifikuar para ndeshjes Forest – Brentford, e cila përfundoi me fitoren 3-1 të vendasve.

Në një video të incizuar nga një tifoz i Brentford në tribunën e mysafirëve, dëgjohet një tifoz i Forest duke bërtitur: “Po për Terry Hennessey?”, duke iu referuar ish-lojtarit të klubit që ndërroi jetë javën e kaluar në moshën 82-vjeçare. Tifozi menjëherë u qortua nga të tjerët në stadium, ndërsa një tjetër tentoi të niste një brohoritje për Hennessey, por edhe ai u hesht nga të pranishmit.

Tifozët në rrjete sociale reaguan shpejt ndaj videos.

“Fajin nuk mund t’ia vësh Nottingham Forest, shumica e tyre qartë nuk ishin të lumtur me këtë,” shkroi një tifoz në TikTok.

“Disa individë nuk përfaqësojnë gjithë tifozërinë.”

Ndërsa një tjetër shtoi: “Si tifoz i Forest, ndjehem disi i turpëruar.”

Nottingham Forest ka lëshuar tashmë një deklaratë duke konfirmuar se klubi fillimisht kishte konsideruar të mbante homazh për Hennessey në të njëjtën kohë me heshtjen për Jota dhe Silva, por vendosi të mos e bënte.

@mrcombatscar Js disrespect pmo off #football @Nottingham Forest @Brentford Football Club #joya #bfc #fyp ♬ original sound - ★𝐜𝐡𝐚𝐫𝐥𝐢𝐞★

“Nottingham Forest u pikëllua thellë kur mësoi për ndarjen nga jeta të Terry Hennessey, një legjende të vërtetë të klubit tonë të futbollit, kontributet e të cilit nuk do të harrohen kurrë,” thuhej në deklaratën e klubit të lëshuar të martën.

“Ne e kuptojmë që shumë tifozë mbetën të habitur pse nuk pati homazh për Terry para ndeshjes sonë të fundit ndaj Brentford. Në atë rast, të gjitha klubet e Premier League ranë dakord të nderonin jetët e Diogo Jota dhe Andre Silva pas ndarjes së tyre tragjike nga jeta. Ndërsa e kemi shqyrtuar mundësinë për të nderuar edhe Terry-n në të njëjtën kohë, pas diskutimeve të brendshme, menduam se kjo nuk do të tregonte respektin e plotë që meritojnë Terry, apo Diogo Jota dhe Andre Silva. Prandaj, ne do ta mbajmë homazhin për Terry Hennessey para ndeshjes sonë në shtëpi kundër West Ham United, të dielën më 31 gusht. Shpresojmë që të gjithë të bashkoheni me ne për të festuar jetën dhe trashëgiminë e tij.”

Nottingham Forest do të përballet fillimisht me Crystal Palace si mysafir të dielën, para se të presë West Ham-in fundjavën tjetër, kur edhe do të mbahet homazhi për Hennessey. /GazetaExpress/