Mbrojtësi i Manchester United, Diogo Dalot, ka këmbëngulur se do të vazhdojë të japë gjithçka për klubin dhe se nuk do të luajë rolin e viktimës pas fitores 3-2 të “Djajve të Kuq” ndaj Arsenalit në “Emirates Stadium”. Dalot startoi sërish në krahun e mbrojtjes për United, teksa Michael Carrick i qëndroi besnik skemës 4-2-3-1.

Pas një nisjeje të baraspeshuar, ishin “Topçinjtë” që kaluan në epërsi, pasi Lisandro Martinez, pa dashje, e dërgoi topin në portën e vet. Më pak se 10 minuta më vonë, United barazoi rezultatin, kur Bryan Mbeumo përfitoi nga një pasim i gabuar mbrapa, dribloi David Raya-n dhe realizoi golin e barazimit.

Me shifrat të barabarta në pushim, United kaloi në avantazh falë një gjuajtjeje spektakolare të Patrick Dorgu, e cila u ndal fillimisht në traversë dhe më pas përfundoi në rrjetë. Kur mbetën vetëm gjashtë minuta nga koha e rregullt, dukej se skuadra e Carrick do të duhej të kënaqej me një pikë, pasi Mikel Merino shtyu topin përtej vijës fatale pas një tollovie në zonën e United.

Por në skenë doli zëvendësuesi Matheus Cunha, i cili shënoi golin e fitores tre minuta para fundit të kohës së rregullt, duke e ngjitur United në vendin e katërt. Sezoni ka qenë i luhatshëm për United, me lojtarët dhe ish-trajnerin Ruben Amorim që kanë qenë shpesh në shënjestër të kritikave për paraqitjet e tyre.

Megjithatë, duke folur për MUTV pas përfundimit të ndeshjes, Dalot theksoi se do të vazhdojë të japë maksimumin, ndërsa United synon kualifikimin në Ligën e Kampionëve sezonin e ardhshëm.

“Duhet të vish në Carrington çdo ditë duke u përpjekur të japësh më të mirën tënde, për të qenë në nivelin e standardeve që duhet të ketë ky klub,” tha ai.

“Pastaj, ajo që bëjmë në fushë do të jetë pasojë e asaj që bëjmë çdo ditë. Ndonjëherë funksionon, ndonjëherë jo.

“Por mund ta shihni se kur gjithçka është e sinkronizuar, kur të gjithë kemi të njëjtën energji, kur të gjithë duam të njëjtën gjë, ne mund të fitojmë. Dhe unë besoj vërtet në këtë.”

Dalot shtoi më tej: “Gjithmonë përpiqem ta përcjell këtë mesazh te të gjithë. Fakti që jam këtu prej një kohe të gjatë më jep edhe më shumë përgjegjësi në këto momente. Dhe kjo është gjëja më e rëndësishme për mua.

“Për aq kohë sa e vesh këtë fanellë, nuk do të fshihem, nuk do të luaj rolin e viktimës.

“Ne thjesht duhet të dalim në fushë, të japim gjithçka për klubin dhe, së bashku, mund të kemi momente si ky dhe shpresojmë të nisim një seri shumë të mirë ndeshjesh.”