Aktori i njohur Shkumbin Istrefi ka reaguar me anë të një statusi në rrjetet sociale në lidhje me titrat e vënë poshtë serialit “Rrushe”
Seriali i njohur “Rrushe” këto ditë ka filluar të shfaqet në televizionin Kombëtar të Shqipërisë, “Top Channel”.
Njëri prej prodhimeve më të mira filmike të pas luftës, “Rrushe” vazhdon të jetë njëri prej serialeve më të mira të prodhuara kosovare, por shumë njerëz kanë reaguar për titrat që shfaqen në këtë film poshtë serialit.
“Seriali "Rrushe" ka filluar të shfaqet në Top Channel. Në transmetim shfaqen edhe titrat ne gjuhën shqipe (afërsisht standardi). Po lexoj reagime të ndryshme lidhur me këtë çështje”, ka shkruar fillimisht Istrefi.
“Unë mendoj që është mirë që seriali shfaqet me titra shqip për dy arsye kryesore.
1. Qe ngjarjen ta kuptojnë edhe personat që nuk mund të dëgjojnë.
2. Që ngjarja të kuptohet nga secili shqiptar kudo që jeton.
Gjuha e folur në serial është gjuhë e folur e karaktereve, në mënyrë që loja të jetë më e natyrshme dhe më "besueshme" për shikuesin”, ka shpjeguar aktori dhe profesori në Fakultetin e Artit – dega e aktrimit, Shkumbin Istrefi.
“Seriali "Rrushe" nuk e ka obligim e as qellim afirmimin e gjuhës standarde, por është serial dramë/krim/aksion. Shikim të këndshëm 🥂 dhe bravo për Top Channel që po e shfaq këtë serial, që sipas meje, ka ngritur standardin e prodhimeve televizive të luajtura këndej e andej kufirit. 🥂”.
Kujtojmë se seriali “Rrushe” është një serial kosovar që u prodhua në vitin 2021 dhe u transmetua në platformën online Gjirafa dhe në T7. Ai ka për producent Doarsa Rexhën dhe Valter Lucajn që bëri edhe regjinë e serialit. /GazetaExpress/
