Oda Ekonomike e Kosovës dhe Oda e Tregtisë dhe Industrisë e Serbisë e kanë përkrahur marrëveshjen që do t’i kthejë fluturimet e drejtpërdrejta mes Prishtinës dhe Beogradit.

“Procesi i dialogut dhe bashkëpunimit mes dy Odave tona, i nisur me përkrahjen e Odave Ekonomike Evropiane në vitin 2013, është zhvilluar me qëllimin për t’i afruar komunitetet e bizneseve, për t’i larguar pengesat, për ta përmirësuar mjedisin e përgjithshëm të tregtisë në Serbi, Kosovë dhe rajon dhe për të kontribuar për mirëbesimin dhe normalizimin e marrëdhënieve mes dy palëve”, thuhet në deklaratën e Odës së Tregtisë dhe Industrisë të Serbisë.

Në këtë shkrim thuhet se qëllimi i dialogut mes dy Odave Ekonomike ishte fillimi i fluturimeve të drejtpërdrejta mes Prishtinës dhe Beogradit. Kjo nënkupton largimin e pengesave për lirinë e lëvizjes, thuhet më tej.

Prandaj, Odat Ekonomike e përkrahin fuqishëm marrëveshjen e arritur për fluturime të drejtpërdrejta mes Beogradit dhe Prishtinës dhe bëjnë thirrje që autoritetet pa vonesë të arrijnë marrëveshje për hollësitë teknike me qëllim të fillimit të fluturimeve./Gazeta Express