Para takimit me presidentin e vendit, Hashim Thaçi, lideri i LV-së, Albin Kurti, ka dalë me një video-mesazh, nëpërmjet të cilit i ka kërkuar Lidhjes Demokratike të Kosovës që ta bëjë marrëveshjen sa më shpejt. Kurti i ka bërë publike edhe propozimet e tij për ministra, ndërsa ka kërkuar nga Isa Mustafa që edhe ai t'i propozojë pesë emra, shkruan Gazeta Express.

Kurti ka thënë se sot do të shkojë në takim me presidentin e vendit, Hashim Thaçi, pa pasur marrëveshje me Lidhjen Demokratike të Kosovës.

“Sot u bënë tre muaj nga zgjedhjet e 6 tetorit të vitit të kaluar, kur qytetarët masivisht votuan edhe për ndryshime politike në vend, edhe e bënë Lëvizjen Vetëvendosje subjekt të parë e fitues. Më 26 dhjetor 2019, në seancën konstituive të legjislaturës së shtatë u detyruam të shkojmë pa marrëveshje me LDK-në. Sot, më 6 janar 2020, në takim konsultativ me presidentin e Republikës, sërish jam i detyruar të shkoj pa marrëveshje me LDK-në. Përkundër përpjekjeve të mia të vazhdueshme, nuk m’u bë e mundur të kem një takim me kryetarin e LDK-së para këtij takimi të sotëm me presidentin e shtetit”, ka deklaruar Kurti.

Ai ka thënë se nuk ka kohë për të humbur, derisa i bën thirrje LDK-së që t'i propozojë emrat e ministrive, ndërsa ka publikuar edhe emrat të cilët i ka propozuar ai.

"Të dashur qytetarë të Republikës, Askush prej nesh nuk e ka menduar që viti i ri 2020 do të na zërë pa qeveri. Si kryeministër i ardhshëm i Republikës së Kosovës, si përfaqësues i juaji politik që ka marrë më së shumti vota në dy palë zgjedhjet e fundit parlamentare, theksoj se nuk kemi kohë për të humbur. Koha që po ikën pa kthim nuk është kohë private e individuale e politikanëve, por është kohë e shtetit dhe kohë publike, e të gjithëve e për të gjithë. I bëj thirrje udhëheqjes së LDK-së që sa më parë t’m’i dërgojë emrat e pesë ministrave të saj dhe të zëvendëskryeministrit apo të zëvendëskryeministres së parë nga radhët e saj”, shton ai.

Lideri i LV-së ka bërë thirrje që të fillohet puna për krijimin e qeverisë.

“Nga Lëvizja Vetëvendosje, unë si kryeministër i qeverisë së re, kam përzgjedhur: për zëvendëskryeministër të dytë të Qeverisë Haki Abazin, për ministre të Drejtësisë Albulena Haxhiun, për ministër të Punëve të Jashtme dhe Diasporë prof. Blerim Rekën, për ministër të Financave dhe Transfereve prof. Besnik Bislimin, për ministër të Ekonomisë, Tregtisë dhe Industrisë Rozeta Hajdarin, dhe për ministër të Shëndetësisë dhe Sportit Arben Vitinë. Le t’ia fillojmë punës për të mirën e qytetarëve, e sipas programit qeverisës tashmë të dakorduar. Unë zotohem se menjëherë pasi t’i kemi ata gjashtë emra, do ta sjell emrin e ministrit nga pakicat joserbe dhe atë të pakicës serbe, por edhe emrat e së paku 10 zëvendësministrave”, thotë ai. /GazetaExpress/