Një operacion policor i zhvilluar njëkohësisht në Francë, Itali dhe Zvicër kundër një rrjeti ndërkombëtar trafiku kokainë dhe pastrimi të parave në favor të Mafias italiane çoi në arrestimin e shtatë personave, njoftoi sot prokuroria e Marselisë, në jug të Francës.

Hetimi nisi në janar 2023 pas informacioneve nga autoritetet zvicerane për një shtetas italian që konsiderohej i dyshuar për pastrim të madh të parave “në favor të organizatave të Mafias italiane, si Camorra dhe ‘Ndrangheta”, sipas deklaratës së prokurorit të qytetit të dytë më të madh francez, Nicolas Besson.

Pas një hetimi dyvjeçar, autoritetet gjyqësore, Jirs e Marselisë, prokuroria anti-Mafia e Napolit, prokuroria e Konfederatës Zvicerane dhe shërbimet hetimore SR e Marselisë, karabinierët italianë, policia federale zvicerane dhe belge, zbuluan një mekanizëm të komplikuar për transportin e kokainës. Droga ishte e fshehur “në automjete luksoze të veçanta”.

Njëkohësisht, hetimet e Jirs dhe SR të Marselisë zbuluan “praninë e pasurive në rajonin Alpe-Maritëm të Francës jugore, të zotëruara nga i dyshuari kryesor dhe partnerja e tij, me origjinë nga Mali i Zi, si dhe shumë kompani franceze dhe të huaja me lidhje të dyshimta financiare me kompani italiane”.

Në nëntor, doganat belge konfiskuan në portin e Anverës një ngarkesë kokainë me origjinë nga Amerika Latine, duke vendosur lidhje mes “disa të dyshuarve italianë dhe malazezë, dhe disa kompanive dhe kompanive fasadë për pastrim parash, kryesisht përmes faturave të falsifikuara dhe investimeve në pasuri të paluajtshme”.

Të hënën, më 23 shkurt, një operacion i njëkohshëm në Francë, Itali dhe Zvicër rezultoi në arrestimin e katër personave në territorin francez dhe tre në Itali.

Janë konfiskuar shumë automjete luksoze, pasuri me vlerë mbi pesë milionë euro, si dhe kriptomonedha me vlerë 60.000 euro dhe 26.000 euro në para të gatshme.