Shefi i Shtabit të Përgjithshëm të Ushtrisë amerikane, Dan Caine, dha detaje mbi urdhrat e Presidentit të SHBA-së, Donald Trump, për nisjen e Operacionit “Epike Orgji” kundër Iran, në koordinim me Izraelin.

Gjatë një konference të përbashkët për shtyp me Sekretarin e Mbrojtjes, Pete Hegseth, Caine shpjegoi: “Trump dha dritën jeshile për misionin kundër Iranit në orën 15:38 të së premtes”.

“Presidenti dha urdhrin, dhe po e citoj fjalë për fjalë: Operacioni Epike Orgji miratohet. Nuk ka kthim pas. Paç fat. Fund raportimi”, shtoi Caine, duke sqaruar se bëhet fjalë për një operacion të zhvilluar gjatë ditës, i cili u bazua në një “ngjarje të rëndësishme” që aktivizoi sulmin.

Sipas tij, sulmi u ekzekutua nga forcat izraelite me mbështetje të inteligjencës amerikane. Sipas gazetës The Wall Street Journal, “ngjarja e rëndësishme” ishte një mbledhje e Udhëheqësit Suprem të Iranit, Ali Khamenei, dhe zyrtarëve të tjerë në një vendndodhje në Teheran.

Gjenerali Caine deklaroi se Shtetet e Bashkuara lëshuan raketa Tomahawk nga deti, me shumë gjasë nga shkatërrues dhe nëndetëse të pajisura me raketa të drejtuara, ndërsa paralelisht u përdorën edhe municione precize nga toka, ka transmetuar Panorama.

“Operacioni ishte një sulm masiv dhe i koordinuar në të gjithë spektrin e luftës, duke synuar më shumë se një mijë objektiva gjatë 24 orëve të para”, tha ai.

Në fazën fillestare të operacionit, Komanda Qendrore e SHBA-së për Lindjen e Mesme, United States Central Command (CENTCOM), u përqendrua në goditjen e infrastrukturës së Gardës Revolucionare, forcave detare, objekteve të raketave balistike dhe infrastrukturës së inteligjencës, me synim ngatërrimin dhe çrregullimin e forcave iraniane.

SHBA-ja koordinoi gjithashtu operacione në hapësirë dhe në hapësirën kibernetike për të ndërprerë rrjetet e komunikimit dhe sensorët, duke “verbëruar” në thelb kundërshtarin, sipas Caine.

“Mbi 100 avionë u angazhuan në një valë të vetme, në një sulm shkatërrues kundër Iranit… dhe arritëm të interceptojmë qindra raketa të lëshuara drejt forcave tona dhe aleatëve tanë”, theksoi ai, duke shtuar se vlerësimi i dëmeve të shkaktuara do të kërkojë kohë, pasi operacioni nuk ishte “një veprim i vetëm i izoluar”.