Organizata “Kolektivi për mendim dhe veprim feminist” kanë vendosur sot në hyrje të presidencës së Republikës së Kosovës një baner me mbishkrimin “Jo në emrin tonë, ne jemi për çlirimin e Palestinës”, duke kundërshtuar kështu vendimin e Kosovës për t’iu bashkuar Bordit të Paqes së themeluar nga SHBA-të.

Sipas kësaj organizate, presidentja Osmani duke iu bashkuar Bordit të Paqes  “e legjitimon gjenocidin dhe e bën bashkëfajtore Kosovën për kolonializimin e mëtejshëm të popullit palestinez”.

Kjo organizatë në reagim kanë kundërshtuar edhe dërgimin e trupave të FSK-së ë Gaza, derisa thonë se vendimi krye në vete i presidentes Osmani është një manovrim populist që përdor pro-amerikanizmin për të garantuar edhe një mandat.

Reagimi i plotë:

Presidentja e Kosovës, Vjosa Osmani, e ka futur Kosovën në “Bordin e Paqes” së Donald Trump, i mandatuar për ta administruar territorin e Gazës. I themeluar si një trupë ndërshtetërore që për kryetar, anëtar të përhershëm dhe me të drejta eskluzive ka Donald Trump si individ,, Bordi i Paqes synon ta menaxhojë Gazën nëpërmjet vazhdimit të nënshtrimit, uzurpimit dhe shfrytëzimit të burimeve natyrore e njerëzore. Nën pretekstin e “luftës ndaj terrorizmit”, ky projekt pritet të shërbejë si garantuese e kolonializmit të mëtejshëm të popullit palestinez, veç se tash me apetite më të gjera kapitaliste. Përveç se të qenurit një ndërmarrje tjetër uzurpatore, Bordi i Paqes shënon një kthesë tjetër politike, duke e bërë kështu rendin ndërkombëtar ndërmarrje personale që nënshtron shtete për grumbullim individual të kapitalit.

E ftuar nga Trump, Vjosa Osmani e ka zotuar pjesëmarrjen e Kosovës. Sipas planeve të këtij Bordi, shtetet anëtare do të dërgojnë trupa ushtarake për administrimin e zonave të Gazës si dhe, në rast të synimit për t’u bërë anëtare të përhershme, duhet të paguajnë mbi 1 miliardë dollarë për anëtarësi. Lëvizja e presidentes Osmani shënon një rreshtim i cili përveç se e legjitimon gjenocidin dhe e bën Kosovën bashkëfajtore në kolonializimin e mëtejshëm të popullit palestinez, paraqet precedent të rrezikshëm për shtetin dhe popullin e Kosovës. FSK-ja, e formuar për të mbrojtur sovranitetin e Kosovës, do të dërgohet për të mbajtur një rend gjenocidal, e në këtë mision do të rrezikohen dhe të vriten në fushëbetejë me ata/o që luftojnë për lirinë e tyre.

Ne e vërejmë që rendi botëror është duke iu nënshtruar çdo herë e më egërsisht forcave fashisto-kapitaliste dhe që organizimi ndërkombëtar e fati i shteteve të vogla është duke u disiplinuar nëpërmjet kërcënimit të përdorimit të forcës materiale prej shteteve të mëdha. Po ashtu, e kuptojmë që Kosova është në pozicion të cënueshëm në këtë rikonfigurim global dhe negocion vazhdimisht me sigurinë e vet kombëtare, duke qenë se rreziku nga shteti fashist i Serbisë mbetet ende real. Mirëpo, siguria jonë nuk mund të tregtohet me okupimin e një populli tjetër. Kosova nuk mund ta legjitimojë bashkëfajësinë e saj në këtë ndërmarrje duke u thirrur në aleanca strategjike ndërkombëtare. Nuk ka aleancë që e shplanë gjakun e vuajtjen e popullit palestinez. Paçka se ky pozicionim krye në vete i Osmanit nuk është thjesht kalkulim për interesa kombëtarë. Ky është manovrim populist i cili e operacionalizon pro-amerikanizmin si kartë politike që garanton mandat.

Ne si qytetare e qytetarë të kësaj republike, kumtojmë që ju nuk keni mandat prej nesh të shkoni të pushtoni shtete tjera, dhe kërkojmë që kjo marrëveshje të mos ratifikohet në Kuvend. Shteti i Kosovës nuk mund të rreshtohet krah një pedofili i cili tash dëshiron edhe hise në territorin palestinez. Ne qëndrojmë për çlirimin e çdo populli dhe të tokave të tyre. Ne qëndrojmë në solidaritet me popullin palestinez dhe rezistencën e përpjekjet e tyre për çlirim, sot e përgjithmonë.