Divock Origi vazhdon t’i kushtojë Milanit pa dhënë asnjë kontribut në fushë, dhe sipas raportimeve më të fundit, kërkon edhe 2 milionë euro të tjera për të pranuar zgjidhjen e parakohshme të kontratës së tij.

Rossonerët janë duke pastruar skuadrën për të hapur hapësira për afrime të reja, duke liruar zyrtarisht Luka Jovic në përfundim të kontratës, ndërsa lojtarët si Tammy Abraham, Joao Felix, Riccardo Sottil dhe Kyle Walker janë kthyer në klubet përkatëse pas huazimeve.

Një nga emrat që klubi dëshiron më së shumti ta largojë është pikërisht Origi. Sulmuesi belg u afrua si lojtar i lirë nga Liverpool në vitin 2022 dhe firmosi për një pagë prej 4 milionë euro neto në sezon (5.2 milionë euro bruto). Megjithatë, ai zhgënjeu totalisht, duke zhvilluar vetëm 36 ndeshje zyrtare dhe më pas u huazua te Nottingham Forest, për t’u lënë tërësisht jashtë planeve në sezonin 2024–25.

Këtë sezon, Origi u regjistrua vetëm me ekipin e të rinjve “Milan Futuro” dhe nuk ka luajtur asnjë minutë. Pavarësisht kësaj, ai nuk pranon të ndërpresë kontratën në mënyrë të njëanshme pa marrë një “kompensim” prej 2 milionë eurosh – një shumë që përfaqëson rreth 50% të pagës që do të përfitonte deri në përfundim të kontratës në qershor 2026.

Situata mbetet e ndërlikuar për Milanin, që do të duhet të vendosë nëse do të pranojë këtë “shpërblim ndarjeje” për të liruar hapësira në buxhetin e pagave dhe në skuadër.