Victor Osimhen i ka bërë të ditur Galatasarayt dëshirën e tij për të qëndruar te klubi turk, raportojnë mediat italiane.

Sulmuesi i Napolit, i cili sezonin e kaluar ishte i huazuar te skuadra e Superlig, ka refuzuar një ofertë të majme nga klubi saudit Al-Hilal dhe është i vendosur të vazhdojë aventurën në Turqi - sipas asaj që raporton “Corriere dello Sport”, përmes “CalcioMercato”.

Tani mbetet vetëm që Galatasaray dhe Napoli të arrijnë një marrëveshje për shumën e transferimit, shkruan "Gazeta Express".

Në kontratën e Osimhenit ekziston një klauzolë lirimi prej 75 milionë eurosh, e vlefshme vetëm për klubet jashtë Italisë.

Napoli është i gatshëm ta shesë lojtarin vetëm nëse kjo klauzolë aktivizohet.

Megjithatë, raportimet sugjerojnë se në Turqi disa kompani janë të gatshme të ndihmojnë përmes sponsorizimeve, për të mbuluar një pjesë të kësaj klauzole.

Për këtë arsye, duket se është çështje kohe para se Galatasaray të bëjë një ofertë zyrtare për Napolin – që do të thotë se çdo klub tjetër i interesuar duhet të veprojë shpejt, për të mos e humbur mundësinë për ta siguruar nigerianin.

Osimhen shënoi 37 gola dhe dhuroi 8 asistime në 41 ndeshje me Galatasarayn sezonin e kaluar./GazetaExpress/