Kosova vuri nënshkrimin e saj në Kartën e Bordit të Paqes si një nga shtetet themeluese të këtij mekanizmi të ri të krijuar nga presidenti Trump. Në ceremoninë e udhëhequr nga presidenti amerikan shkoi presidentja Osmani për ta firmosur. E para e shtetit konsultimin me liderët në vend e la kur të kthehej. Nga Presidenca sot paralajmëruan se takimet me liderët partiakë mbi këtë temë do të mbahen “shumë shpejt”.

Gazeta Express

Presidentja Vjosa Osmani iu përgjigj pozitivisht një “ftese personale” të presidentit amerikan Donald Trump që Kosova të bëhej anëtare themeluese e Bordit të Paqes, një nismë e qeverisë amerikane e dalë nga plani për Gazën që synon promovimin e paqes në botë.

Osmani pranoi këtë ftesë dhe u nis drejt Davosit për të marrë pjesë në ceremoninë inauguruese të 22 janarit krah liderëve të shteteve të tjera, kryesisht joeuropiane meqë nisma e Trump u refuzua nga shumica e vendeve të Bashkimit Europian.

“Historia i mban mend ata që bëjnë hapa të guximshëm në ndërtimin e paqes - dhe ne jemi gati”, shkroi Osmani kur publikoi ftesën.

Miratimi i pjesëmarrjes së Kosovës në këtë bord duhet të kalojë në Parlamentin e Kosovës. Për këtë, presidentja Osmani konsultimin me liderët vendorë e planifikoi ta bënte pas nënshkrimit.

Nga Presidenca e Kosovës sot për Gazetën Express tha se presin që këtë takim ta realizojnë së shpejti meqë ishin në pritje të përfundimit të procedurave në Komisionin Qendror të Zgjedhjeve për rezultatet e 28 dhjetorit.

“Ishim në pritje të certifikimit te rezultateve me shpresë që ndodhin më shpejt, por fatkeqësisht u vonua procesi më shumë se që pritej, për shkak të rinumërimit dhe ankesave. Presim që shumë shpejt, pra në ditët në vijim, t'i realizojmë këto takime”, ka thënë Bekim Kupina, këshilltar për media i Presidentes.

Ngjarjen në Davos Osmani e përdori edhe për qëllime të veta teksa po synon edhe një mandat si presidente. Kontaktet me jashtë, përfshirë amerikanët, ajo po i përdor në funksion të planit të saj për të siguruar  mbështetjen e deputetëve.

Deklaratat dhe veprimet e saj po kritikohen nga një gazetë me peshë në Gjermani.

Ishte gazetari i FAZ, Michael Martens, që së fundi në disa shkrime dhe postime ka kritikuar gjerësisht Osmanin po tenton të shfaqë afërsi me presidentin Trump dhe familjen e tij për të përmbushur qëllimin e saj për të qëndruar presidente edhe për një mandat.

Ai tha se bashkimin në nismën e Trumpit e bëri pa koordinim me kryeministrin në detyrë, Albin Kurti.

Martens tha se Osmani po e përdor Trumpin si armë ndaj Parlamentit të Kosovës se nëse s’votojnë për zgjedhjen e saj presidente “do të kenë probleme me SHBA”.

“Osmani ia paraqet veten publikut si e preferuara e Trump, duke kërcënuar në mënyrë indirekte anëtarët e parlamentit, të cilët zgjedhin presidentin, me kontaktet e saj (të supozuara) të mira me klanin Trump, duke i përdorur ato si armë”, kishte shkruar Martens në X.

Gazetarin gjerman e nxiti të hidhej në kritika më së shumti një ngjarje e organizuar nga Osmani në një kinema të kryeqytetit për të promovuar premierën e një dokumentari të Zonjës së Parë të SHBA’së, “Melania”.

Në anën tjetër, qeveria në detyrë e Kosovës heshti për anëtarësimin e Kosovës në Bordin e Paqes pavarësisht se u prezantua si diçka historike për vendin.

Sidoqoftë, një koment i kishte shpëtuar kryeministrit në detyrë, Albin Kurti, meqë ia kishin kërkuar gazetarët në një ngjarje. Pa e përmendur fare Osmanin, Kurti u duk pozitiv për këtë, ndërsa për t’iu shmangur pyetjes direkte, ai zgjodhi të flasë për rolin e FSK-së në Gaza.

“Kemi filluar së pari me pjesëmarrjen tonë në Forcën Ndërkombëtare Stabilizuese për Gaza dhe aty unë e di që Kosova është përfaqësuar në konferencën në Doha në Katar nga Bashkim Jashari. Kemi shprehur gatishmërinë tonë që të marrim pjesë këtu ku FSK është e mirënjohur për kërkim-shpëtim dhe deminim dhe jo vetëm. Ne kemi qenë të interesuar që të marrim pjesë në organet vendimmarrëse politike për këtë forcë. Procesi do të ecë më tutje”.

Më pas shtoi se Kosova do të jetë e gatshme për të dhënë kontribut kudo që kërkohet paqja në botë.

“Unë jam kryeministër në detyrë, nuk jam ende në mandatin tim të tretë. Kudo që ka nevojë për paqe në botë, ne dëshirojmë që të kontribuojmë sepse kemi qenë përfitues të paqes në vendin tonë përmes forcave ndërkombëtare, andaj tash duam që të marrim pjesë me forcat tona dhe kapacitetet tona edhe në paqe në vende të ndryshme në botë”.

Ndryshe nga Kurti, vendimin e Osmanit e kishin përshëndetur liderët tjerë të partive.

“Shumë pozitive” dhe “e dobishme” për Kosovën është parë anëtarësimi i vendit në Bordin e Paqes nga kreu i PDK-së.

“Aty ku janë Shtetet e Bashkuara të Amerikës, aty duhet të jetë Kosova”, kishte thënë ai.

Kreu i LDK-së, Lumir Abdixhiku, kishte thënë se partia e tij e mbështet “këtë hap të madh drejt një kapitulli të ri dhe i gëzohet këtij fakti historik”.

“Sepse sukseset e Kosovës janë arritje kombëtare para së cilave e me të cilat mburremi të gjithë”.

Po të njëtin mendim ndau edhe kreu i AAK-së, Ramush Haradinaj.

“Kjo pjesëmarrje përforcon rolin e Kosovës si një faktor konstruktiv i paqes dhe stabilitetit rajonal dhe global dhe krijon mundësi konkrete për riforcimin e partneritetit strategjik me SHBA-në, i cili ka qenë dhe mbetet shtylla kryesore e sigurisë, shtetndërtimit dhe orientimit euroatlantik të Kosovës”.