Ish-trajneri i Kombëtares së Shqipërisë, Christian Panucci, beson se është ende shumë herët për të rinisur kampionati në Serie A, pasi që ka theksuar se pasuria më e madhe në botë është jeta dhe shëndeti.

Përhapja e koronavirusit ka bërë që pothuajse të gjitha kampionatet në botë të pezullohen dhe futbollistët të detyrohen të stërviten vetëm nëpër shtëpitë e tyre, pasi që ata janë udhëzuar të vetizolohen dhe seancat stërvitore në klube janë anuluar, transmeton Gazeta Express.

Ende nuk dihet se kur do të ketë mundësi të kthehet futbolli në fushën e blertë, mirëpo klubet në Serie A po tentojnë ta gjejnë një mënyrë për ta rinisur sezonin sa më shpejt. Por, Panucci u ka dal në mbrojtje autoriteteve qeveritare.

“Kjo është pjesë e Italisë. Klubet mund të thotë çfarëdo që të duan, por në fund vendos qeveria”, ka thënë Panucci.

“Rinisja e kampionatit pa qenë 100 për qind të sigurt do ta komplikojë edhe më shumë situatën. Unë e kuptoj se ka shumë interesa, por duhet të kuptohet se pasuria më e madhe është jeta dhe shëndeti”.

Ish-futbollisti legjendar i Romës ishte pensionuar nga karriera e tij në gusht të vitit 2010. Ai vendosi të bëhet trajner më vonë dhe e mori drejtimin e Kombëtares së Shqipërisë pas largimit të Gianni de Biasit, mirëpo ka qenë i papunë që kur u shkarkua nga FSHF-ja në mars të vitit 2019. /Gazeta Express/