Papa Leone XIV bëri thirrje për një armëpushim dhe që lufta në Iran të ndalej, të paktën përkohësisht, gjatë ditëve të Pashkëve Katolike.
“Ka indikacione se lufta mund të përfundojë, ndoshta edhe para Pashkëve. Shpresojmë kështu. Ne bëjmë thirrje të vazhdueshme për paqe”, u shpreh Papa, duke përmendur edhe deklaratat e Donald Trump për luftën.
“Jam informuar se Presidenti Trump thuhet se ka deklaruar se dëshiron t’i japë fund konfliktit. Le të shpresojmë se ai po përpiqet të gjejë një rrugëdalje, të gjejë një mënyrë për të zvogëluar dhunën dhe bombardimet. Është diçka që mund të kontribuojë ndjeshëm në kufizimin e urrejtjes gjithnjë në rritje në Lindjen e Mesme dhe më gjerë”, u shpreh më tej Ati i Shenjtë.
“Ne bëjmë thirrje të vazhdueshme për paqe, por për fat të keq shumë njerëz mbështesin promovimin e urrejtjes, dhunës dhe luftës. Bëj një thirrje të re, duke u bërë thirrje kryesisht të krishterëve të jetojnë Pashkën, të vetëdijshëm se Jezusi është ende i kryqëzuar”, përfundoi Leone XIV.
