Duke folur në një mbledhje të bordit të Federal Security Service (FSB) – shërbimi i sigurisë së Rusisë – presidenti rus Vladimir Putin sot nuk bëri asnjë referencë thelbësore për luftën që ai nisi kundër Ukrainës katër vjet më parë.

Në vend të kësaj, ai iu referua pretendimeve të pabazuara të shërbimit të inteligjencës së jashtme të Rusisë, sipas të cilave Mbretëria e Bashkuar dhe Franca po planifikonin të armatosnin Ukrainën me një bombë bërthamore.

“[Mbretëria e Bashkuar dhe Franca] ndoshta e kuptojnë se si mund të përfundojë çdo sulm ndaj Rusisë që përfshin një element bërthamor”, paralajmëroi Putin, shkruan BBC, transmeton Gazeta Express.

Kur u pyet lidhur me deklaratën e Shërbimit të Inteligjencës së Jashtme të Rusisë (SVR), i cili akuzonte Mbretërinë e Bashkuar dhe Francën se po planifikonin të armatosnin Ukrainën me një armë bërthamore ose me një “bombë të pistë”, një burim i qeverisë franceze u përgjigj me një postim në X të French Response.

Kjo llogari në X u lansua nga Ministria e Jashtme e Francës shtatorin e kaluar për të kundërshtuar lajmet e rreme dhe dezinformimin nga kundërshtarët e Francës në luftën e informacionit, duke përdorur humorin dhe ironinë si kundërpërgjigje.

Në një seri prej gjashtë postimesh, duke ripublikuar mesazhe nga llogari që shpërndanin akuzën e SVR-së, French Response u përgjigj me fraza si:

“Pesë vjet pas ‘luftës treditore’, Rusia do të preferonte vërtet që ju të përqendroheni te armët bërthamore franceze dhe britanike”.

“Rusia, e futur thellë në vitin e pestë të të supozuarës “luftë treditore”, paralajmëron se armët bërthamore franceze dhe britanike përbëjnë rrezikun.