Benfica ka dalë në mbrojtje të lojtarit të saj Gianluca Prestianni, duke deklaruar se ai është viktimë e një “fushate shpifjeje”, pas akuzave për racizëm të bëra nga sulmuesi i Real Madrid, Vinícius Júnior.

Incidenti ndodhi gjatë pjesës së dytë të ndeshjes së UEFA Champions League, e cila u ndërpre për 11 minuta pasi Vinícius raportoi te gjyqtari Francois Letexier një koment me përmbajtje raciste. UEFA ka emëruar një inspektor për të hetuar rastin.

Disa lojtarë të Real Madridit, përfshirë Kylian Mbappé dhe kapitenin Federico Valverde, deklaruan se e dëgjuan Prestiannin të përdorte fyerje racore, pretendim që u mohua nga klubi portugez. Në një reagim zyrtar, Benfica theksoi se mbështet plotësisht versionin e lojtarit dhe mirëpret hetimin e UEFA-s.

Prestianni ka mohuar akuzat, duke thënë se Viníciusi e ka keqkuptuar situatën, ndërsa trajneri i Benficës, José Mourinho, ka bërë thirrje për qetësi dhe paanshmëri, deklarata që janë kritikuar nga organizata kundër diskriminimit Kick It Out.

Ndeshja e kthimit mes dy skuadrave do të zhvillohet javën e ardhshme në Madrid, ndërsa pritet që UEFA të përshpejtojë hetimet përpara përballjes vendimtare. /GazetaExpress