“Gazzetta dello Sport” raporton se Milani do t’i ofrojë Massimiliano Allegri një kontratë të re deri në vitin 2028, pasi kuqezinjtë e shohin trajnerin italian si gurin themeltar të projektit të tyre.

Kualifikimi i mundshëm i Milanit në Ligën e Kampionëve për sezonin 2026-27 i ka shtyrë drejtuesit e klubit të përgatisin një ofertë për zgjatjen e kontratës së Allegrit.

Sipas “Gazzettas”, Allegri mbetet një pjesë kyçe e projektit të Milanit, ndaj klubi do t’i ofrojë teknikut italian një zgjatje njëvjeçare të kontratës deri në qershor 2028, me opsion për edhe një sezon tjetër.

Kualifikimi në Ligën e Kampionëve do t’i lejojë gjithashtu Milanit t’i ofrojë Allegrit një rritje page nga 5 milionë euro në vit aktualisht, në 6 milionë euro në sezon.

Megjithatë, raportime të mëparshme në Itali kishin sugjeruar se e ardhmja e Allegrit te Milani pas verës ishte e pasigurt.

Sipas “Corriere dello Sport”, Real Madridi e sheh Allegrin si një kandidat të mundshëm për stolin e tyre në sezonin 2026-27, ndërsa “Sportitalia” ka raportuar se trajneri i lindur në Livorno po shqyrton të ardhmen e tij në “San Siro” për shkak të shqetësimeve rreth drejtimit të klubit.

I pyetur për këtë çështje në një konferencë të fundit për shtyp, Allegri u shpreh:

“Ka harmoni të plotë me klubin në lidhje me thashethemet që dolën këtë javë.

Sigurisht, në çdo diskutim mund të ketë pikëpamje të ndryshme. Është e rëndësishme që të gjithë të punojnë për të mirën e Milanit. Jam shumë i lumtur që jam kthyer te Milani pas 15 vitesh dhe që kam filluar të punoj me një grup të mrekullueshëm lojtarësh.

Klubi po planifikon dhe po strukturon të ardhmen e Milanit. Për ta bërë këtë, duhet të arrijmë rezultatin më të rëndësishëm. Në mars jemi në një pozicion mjaft të mirë. Tani duhet të shohim nëse jemi mjaftueshëm të mirë për të qëndruar aty ose për të bërë hapin final. Ka harmoni mes klubit dhe meje”./GazetaExpress/