Ylli i Barcelonës, Pedri, ka zbuluar këtë javë identitetin e lojtarit të vetëm që do të donte ta nënshkruante për Blaugranat, nëse do t’i jepej mundësia.

Lojtari në fjalë? Jamal Musiala.

I riu Musiala konsiderohet gjerësisht si një nga talentet më të mëdhenj të futbollit botëror, me paraqitjet e tij për Gjermaninë dhe Bayern Munich që prej kohësh kanë marrë vlerësime të shumta nga tifozët dhe mediat.

22-vjeçari ka një gamë të gjerë cilësish në zonën sulmuese - nga kontrolli i topit, te driblimi, atletizmi dhe nuhatja për gol.

Dhe këto aftësi, siç duket, nuk kanë kaluar pa u vënë re nga Pedri.

Duke folur gjatë një paraqitjeje në kanalin e vëllezërve Buyer në YouTube, sipas “Mundo Deportivo”, ylli i Barcelonës u pyet se cilin lojtar do të nënshkruante për Blaugranat nëse nuk do të kishte kufizime financiare.

Dhe pasi përmendi Musialan, mesfushori shtoi: “Një lojtar që më ka impresionuar shumë është Musiala. Ai është i dëmtuar tani, por do të rikuperohet. Është shumë i mirë”.

Musiala aktualisht po rikuperohet nga një lëndim i rëndë që e pësoi në Kupën e Botës për Klube gjatë verës ndaj PSG-së./GazetaExpress/