Real Madridi e pësoi një eliminim befasues nga Copa del Rey, duke u mposhtur 2:3 nga Albacete, një skuadër e divizionit të dytë të futbollit spanjoll, në të 16-ën e finales së kësaj gare.
Ndeshja përfundoi me një humbje historike për “Los Blancos”, që ishte edhe debutimi i Álvaro Arbeloa si trajner i ekipit të parë, pas shkarkimit të Xabi Alonsos vetëm disa ditë më parë, shkruan “Gazeta Express”.
Fitorja e Albacete u arrit në minutat shtesë të ndeshjes, me golin vendimtar që e vulosi eliminimin e Real Madridit dhe shkaktoi një valë kritikash në opinionin sportiv.
Madrilenët u dukën të paaftë për ta menaxhuar lojën, edhe pse e dominuan posedimin e topit në momente të ndryshme të takimit.
Ish-qendërmbrojtësi i Barcelonës, Gerard Piqué, i njohur për rivalitetin e tij me klubin madrilen, reagoi me ironi pas këtij dështimi.
Përmes një mesazhi në Twitch, ai shkroi: “Buen debut del nuevo Madrid” (“Debutim i mirë për Madridin e ri”), duke u tallur hapur me “Los Blancos” pas humbjes me Albacete dhe debutimit të Arbeloas.
Ky episod i ka ndezur edhe më tej debatet rreth krizës sportive në klub, pas rezultateve negative radhazi në fillim të vitit — një situatë që i ka tronditur tifozët dhe drejtuesit e klubit madrilen. /Gazeta Express
