Andrea Pirlo “nuk e pëlqente Cristiano Ronaldon” kur ishte trajner i Juventusit, zbuloi ndihmës-trajneri i tij. “Ai nuk donte Ronaldon, por nuk mund të bënte asgjë për këtë.”
Mesfushori fitues i Kupës së Botës 2006 u tërhoq nga futbolli në vitin 2018 dhe dy vite më vonë mori rolin e tij të parë si trajner, duke u futur drejtpërdrejt në Juventus në 2020.
Megjithëse qëndroi vetëm një sezon aty, Pirlo arriti të fitonte Coppa Italia dhe Supercoppa Italiana, por u shkarkua në fund të sezonit. Nuk ishte një eksperiencë krejtësisht e kënaqshme, siç konfirmoi Alparslan Erdem, ndihmës-trajneri i tij te Karagumruk vitin pasues.
“Ne analizuam të dhënat, të cilat treguan se Cristiano Ronaldo ishte më i dobëti te sprintet dhe pressingu i lartë,” tha Erdem për podcastin e Bild, sipas Corriere dello Sport.
“Pirlo nuk donte Ronaldon në ekipin e tij, por nuk mund të bënte asgjë, sepse ky ishte Cristiano Ronaldo.”
CR7 përfaqësonte një investim të madh për Bianconerët, si dhe një atraksion të jashtëzakonshëm për sponsorizime dhe të ardhura, kështu që trajneri ndjeu detyrimin të luante veteranin portugez pavarësisht dëshirës së tij.
Sipas ndihmës-trajnerit të tij, nuk ishte vetëm Ronaldo që i ishte imponuar Pirlos: “Pirlo shumë më tepër preferonte Alvaro Moratën, i cili përshtatej në mënyrë perfekte me taktikën e tij 4-4-2. Sistemi thjesht nuk funksiononte me Ronaldon ose Paulo Dybalan, por nuk kishte asgjë që ai mund të bënte për këtë.”
Pas një përvoje tjetër të shkurtër te Sampdoria, Pirlo është tani trajner i United FC në Emiratet e Bashkuara Arabe.
Ndërkohë, Erdem ka marrë një rol kryesor në Maqedoninë e Veriut me klubin Rabotnicki Shkup./GazetaExpress/
