Shërbimi i Inteligjencës së Jashtme të Rusisë (SVR) dyshohet se ka planifikuar organizimin e një atentati ndaj kryeministrit hungarez Viktor Orban për të ndikuar në rezultatin e zgjedhjeve parlamentare të prillit, kjo sipas një raporti të publikuar nga The Washington Post, i cili është bazuar në informacione nga një shërbim inteligjence evropian.
Sipas raportimit, një njësi e SVR-së kishte ngritur shqetësime për rënien e mbështetjes publike për Orban dhe kishte sugjeruar një strategji drastike për të ndryshuar rrjedhën e fushatës.
Një dokument i brendshëm i siguruar nga inteligjenca evropiane përmend nevojën për një “përpjekje për vrasje”, me synimin për ta zhvendosur fokusin e zgjedhjeve nga çështjet socio-ekonomike drejt sigurisë dhe stabilitetit.
Në raport thuhet se një incident i tillë do të krijonte një klimë emocionale në elektorat, duke e kthyer vëmendjen te mbrojtja e sistemit politik dhe siguria kombëtare. Dokumenti i atribuohet Drejtorisë së Masave Aktive (MS), një njësi e SVR-së që merret me operacione ndikimi politik.
Deri më tani nuk ka pasur asnjë sulm fizik ndaj Orban dhe nuk ka konfirmim të pavarur publik për zbatimin e një plani të tillë. Megjithatë, raporti hedh dritë mbi shqetësimet për ndërhyrje të mundshme në zgjedhjet hungareze.
Orban është parë shpesh si një lider që ka mbajtur qëndrime më të afërta me Moskën brenda Bashkimit Evropian dhe NATO-s, përfshirë përdorimin e vetos për të bllokuar ndihmën financiare për Ukrainën. Zëdhënësi i tij, Zoltan Kovacs, nuk ka komentuar mbi këto pretendime.
