Rasti i Lazar Ludajiq, një i ri nga Beogradi që në vitin 2014 pothuajse u vra nga një polic jashtë detyrës, është një shembull i rëndë i pandëshkueshmërisë dhe abuzimit të policisë në Serbi.

Incidenti ndodhi në qershor 2014 në restorantin “Time Out” në Ada Ciganlija, kur Ludajiq, atëherë 22 vjeç, u nxor me forcë nga lokali pa asnjë shpjegim. Në dalje, ai u sulmua brutalisht nga Velimir Ilibashiq, polic jashtë detyrës, i cili e goditi disa herë me grushte dhe shkelma. Pas një goditjeje të fundit, Ludajiq humbi ndjenjat.

Ai u dërgua me urgjencë në spital me gjakderdhje të brendshme dhe iu hoq shpretka për t’i shpëtuar jetën. Mjekët deklaruan se çdo vonesë e vogël do të kishte qenë fatale.

Megjithëse pasojat ishin të rënda dhe ekzistonin pamje video të dhunës, gjykatat serbe e dënuan Ilibashiq-in vetëm me gjashtë muaj arrest shtëpie pa byzylyk elektronik. Ai jo vetëm që nuk u përjashtua nga policia, por vite më vonë u avancua dhe sot është truproja kryesore e ministrit të Brendshëm Ivica Daçiq.

Ludajiq përjetoi edhe presione gjatë hetimeve, përfshirë një situatë ku u thirr për të dhënë deklaratë në polici pa avokat, ndërsa sulmuesi i tij hyri në zyrë, nxori armën dhe e vendosi mbi tavolinë gjatë marrjes në pyetje.

I zhgënjyer nga sistemi gjyqësor dhe mungesa e drejtësisë, Ludajiq u largua nga Serbia dhe sot jeton në Gjermani. Ai deklaron se në një shtet ligjor, një rast i tillë do të kishte pasoja serioze për autorin, gjë që në Serbi nuk ndodhi.

Rasti ka rikthyer në vëmendje akuzat për mungesë kontrolli të brendshëm në Ministrinë e Brendshme të Serbisë dhe për mbrojtjen politike që gëzojnë pjesëtarë të policisë, edhe kur kryejnë krime të rënda ndaj qytetarëve. /Radar