Portugalia mori kryesimin në Grupin F të kualifikueseve për Kupën e Botës pas një fitoreje 3-2 me përmbysje ndaj Hungarisë në Budapest, duke forcuar ndjeshëm shanset për t’u paraqitur në Botërorin e shtatë radhazi.

Pas suksesit në Ligën e Kombeve dhe me një formë dukshëm më të mirë se kundërshtari, Portugalia hyri në ndeshje me vetëbesim, por nuk shfrytëzoi rastet dhe u gjend në disavantazh pas 20 minutash. Zsolt Nagy depërtoi nga krahu i majtë dhe harkimi i tij perfekt u konkretizua nga Barnabás Varga, i cili shënoi me kokë duke e dërguar topin në shtyllë dhe pastaj në rrjetë.

Portugalia sulmonte me ngulm, por pa fat. Cristiano Ronaldo u zemërua kur goditja e tij nga afër u devijua në mënyrë të pabesueshme nga portieri Balázs Tóth, ndërsa i njëjti fat i ra edhe tentativës së João Neves. Megjithatë, miqtë e gjetën barazimin pak para pushimit: një prekje e rastësishme e João Cancelo u shfrytëzua nga Bernardo Silva, i cili kontrolloi topin dhe shënoi fuqishëm në trekëndësh.

Pas rifillimit, Portugalia shtoi presionin dhe e përmbysi rezultatin në minutën e 58-të. Loïc Négo u duk i pafat kur topi u përplas në krahun e tij në zonë, por gjyqtari akordoi penallti. Ronaldo nuk fali nga 11 metra, duke e dërguar topin në këndin e poshtëm majtas dhe duke u bërë golashënuesi më i mirë i të gjitha kohërave në kualifikueset e Botërorit.

Hungaria reagoi dhe arriti të barazonte sërish, sërish me Varga, i cili shënoi me kokë pas një topi të vështirë për mbrojtjen portugeze pas harkimit të Nego-s. Por gëzimi i Puskás Arenës u shua brenda dy minutash: Bernardo Silva asistoi për Cancelo, që shënoi bukur nga jashtë zonës për golin e fitores 3-2.

Me vetëm një pikë nga dy ndeshje, Hungarisë i janë zbehur shanset për t’u kualifikuar direkt në Botërorin e parë që prej vitit 1986, megjithatë ata shpresojnë të sigurojnë vendin në play-off përballë Armenisë dhe Irlandës./GazetaExpress/