Ish-mesfushori i Manchester United, Paul Pogba, raportohet se është në shënjestër të skuadrës saudite Al-Ittihad, e cila shpreson ta mposhtë Monacon në garën për firmën e francezit.
Mesfushori ka zhvilluar bisedime me Monacon në kuadër të rikthimit të tij në futboll pas pezullimit 18-mujor për përdorim të substancave të ndaluara.
Fituesi i Kupës së Botës, aktualisht lojtar i lirë, dukej se ishte afër një kalimi te skuadra e Ligue 1, me një ofertë dyvjeçare në tryezë.
Pogba e pa pezullimin fillestar katërvjeçar të reduktohej në 18 muaj në tetor 2024 dhe ka qenë i lirë të rinisë karrierën që nga muaji mars.
Bisedimet kanë vazhduar, ndërsa të drejtat e imazhit thuhet se janë ndër pengesat kryesore që kanë vonuar transferimin në “Stade Louis II”.
Por, ndonëse drejtuesit e Monacos mbeten optimistë, marrëveshja mund të komplikohet për shkak të interesimit të shtuar nga Arabia Saudite.
Sipas të përditshmes franceze “Foot Mercato”, Al-Ittihad shpreson ta transferojë ish-mesfushorin e Juventusit.
Një kalim te kampionët e Arabisë Saudite do ta bashkonte Pogbanë me ish-bashkëlojtarët e tij në kombëtaren franceze, Karim Benzema dhe N’Golo Kanté.
Monaco përfundoi në vendin e tretë në Ligue 1 sezonin e kaluar dhe oferta për të luajtur në Ligën e Kampionëve mund të jetë joshëse për Pogban, i cili synon rikthimin në kombëtaren franceze përpara Kupës së Botës.
Më herët gjatë kësaj jave, Pogba u ribashkua me disa ish-bashkëlojtarë të tij te Manchester United gjatë Kupës së Botës për Klube.
31-vjeçari udhëtoi drejt Shteteve të Bashkuara për të takuar disa miq të vjetër në Miami, teksa Boca Juniors përballej me Benficën.
Në Instagram, Pogba postoi një foto me mbishkrimin: “Çfarë kënaqësie të shoh miqtë e mi!”, ku shfaqej së bashku me katër ish-lojtarë të United-it, të gjithë aktualisht pjesë e skuadrës argjentinase.
Në “story”-n e tij për 63 milionë ndjekësit, Pogba qëndronte në mes të grupit me krahët rreth dy prej lojtarëve.
Në të majtë të tij ishte portieri Sergio Romero, që luajti 61 herë për United – 21 prej tyre me Pogban – mes viteve 2015 dhe 2021.
Në të djathtë ishte sulmuesi Edinson Cavani, ish-lojtar i PSG-së, i cili luajti 59 herë për United – 36 prej tyre me Pogban – pasi iu bashkua ekipit në vitin 2020 dhe u largua në 2022.
Pranë Romeros ishte mbrojtësi Marcos Rojo, që ishte pjesë e United-it për shtatë vite dhe zhvilloi 48 ndeshje krah fituesit të Kupës së Botës.
Personi i fundit në foto ishte Ander Herrera, i cili luajti 84 herë me Pogban – dhe u përjashtua nga një ndeshje edhe pse nuk ishte në fushë./GazetaExpress/
