Sipas raporteve të ndryshme, Sergio Ramos i ka ofruar veten AC Milanit si lojtar i lirë dhe është i etur të ribashkohet me Luka Modrić.
Mbrojtësi 39-vjeçar u largua nga Evropa në verën e vitit 2024 për një aventurë të re në Meksikë me CF Monterrey, por kontrata e tij skadon më 31 dhjetor.
Kjo do të thotë se nga 1 janari ai do të jetë i disponueshëm si lojtar i lirë dhe raportohet se po kërkon një rikthim në futbollin europian, edhe pse 40-vjetori i tij po afron në mars.
Sipas “Calciomercato.com” dhe mediave të tjera, Ramos dhe përfaqësuesit e tij i janë afruar Milanit për të pyetur nëse klubi do të ishte i interesuar të nënshkruante me këtë lojtar me përvojë të madhe.
Kjo do t’i jepte atij mundësinë të ribashkohej me ish-shokun e tij te Real Madridi, Luka Modrić, i cili po shijon një ringjallje të karrierës së tij në Serie A në moshën 40-vjeçare.
Qendërmbrojtësi mbajti fanellën e Real Madridit nga viti 2005 deri në 2021, përpara se të kalonte te Paris Saint-Germain dhe më pas te Sevilla e Monterrey, ku mori pjesë edhe në Kupën e Botës për Klube këtë verë./GazetaExpress/
