Djali 19-muajsh i një zjarrfikësi, që e humbi jetën gjatë luftës me zjarret në Australi, e ka pranuar medaljen post-mortum në nderim të trimërisë së babait.
Zjarrfikësi Geoffrey Keaton ishte njëri nga dy personat e vdekur gjatë zjarreve më 19 dhjetor në rajonin New South Wales. Djalit të tij iu dha medalja pikërisht në ditën e funeralit të babait.
Vogëlushi ishte veshur me rroba të zjarrfikësve dhe në gojë e mbante një cucëll, kur e pranoi medaljen nga kolegët e babait të ndjerë.
Zjarrfikësi kishte vdekur pasi ishte goditur nga një dru që kishte rënë mbi automjetin me të cilin po lëvizte.
Në funeralin e tij morën pjesë qindra persona. Shumë njerëz e cilësuan heroike punën dhe veprën e tij për ta mbrojtur natyrën.
Një pjesë e madhe e territorit të Australisë është djegur nga zjarret që nga shtatori i vitit të kaluar, shkruan “CNN”, transmeton Gazeta Express.
