Federata e Basketbollit të Kosovës ka dhënë sot detaje rreth organizimit të “Final 8” të Kupës së Kosovës, i cili do të mbahet nga 9 deri më 13 shkurt.

Në fakt, sot është mbajtur një konferencë për shtyp, ku detaje rreth kësaj gare kanë dhënë kryetari i FBK-së, Arben Fetahu dhe kryetari i KB Peja, si organizatore e “Final 8”, Fatmir Gashi.

Fetahu ka premtuar se presin spektakël për Kupë dhe ka treguar pse organizimi i është besuar klubit verdhezi, shkruan “Gazeta Express”.

“Fillimisht ju falënderoj për ardhjen dhe interesimin e madh për këtë konferencë. Jemi shumë të lumtur që Final 8 i Kupës do të mbahet në qytetin e Pejës. Dua të theksoj dy arsye që KB Peja është zgjedhur organizatore. Fillimisht është për nder të Agim Llukës, themeluesit të KB Peja dhe i cili ka dhënë shumë për basketbollin e Kosovës, si dhe organizimi që do të mbahet në Pejë, që ka munguar në vitet e fundit. Besoj se është koha dhe momenti i duhur që Peja të organizojë Kupën e Kosovës. Ne presim spektakël të basketbollit me një organizim të jashtëzakonshëm. Jemi të bindur se, KB Peja në bashkëpunim me FBK-në do të organizojmë për mrekulli Final 8 dhe të jetë një Festival i Basketbollit”, është shprehur Fetahu para mediave.

Ndërkohë, Gashi ka shtuar se ky organizim do të jetë i paparë në basketboll dhe model për vitet e ardhshme.

“Ne jemi të nderuar që Final 8 do të organizohet në Pejë. Ashtu siç e përmendi Fetahu, për nder të Agim Llukës, si dhe besojmë që do të jetë një organizim i paparë dhe të jetë model për vitet e ardhshme. Pra, mund të krijojmë një standard të ri për organizime të ardhshme. Falënderoj FBK-në për punën që po bënë në ngritjen e cilësisë së basketbollit të Kosovës, ku tashmë është një ligë me skuadra të barabarta dhe nuk ka favoritë. Ne presim spektakël nga organizimi, por edhe ndeshje të bukura në parket, pasi do të kemi ndeshje shumë interesante”, ka nënvizuar Gashi.

Fetahu i pyetur nga gazetarët ka folur edhe për tifozët nëse do të jenë të pranishëm.

“Ne kemi bërë kërkesë pranë autoriteteve që të lejohen 50 % e tifozëve. Kjo nuk varet nga ne apo nga KB Peja. Kërkesa jonë është që të lejohen tifozët, por gjithnjë duke respektuar masat, të vaksinuar dhe me maska. Gjithashtu të jemi model edhe në fushatën e vaksinimit. Dua të përmendi edhe dy persona shumë të rëndësishëm për këtë organizim e ata janë: Artina Hasani, Menaxhere e Eventeve në FBK dhe Luan Maloku nga kompania Compact Solution, e kontraktuar nga KB Peja për organizimin e Kupës”, theksoi Fetahu.

Në fund Gashi shtoi se edhe një konferencë tjetër do të mbahet në Pejë, ku do të shpalohen detaje tjera rreth organizimit. /Gazeta Express/

Final 8

Meshkujt

Ndeshjet çerekfinale do të zhvillohen më 9/10 Shkurt 2022 ku takohen:

Golden Eagle Ylli – Drita (Grupi A)

Trepça – Rahoveci (Grupi B)

Peja – Sigal Prishtina (Grupi C)

Prizreni 16 – Bashkimi (Grupi D)

Në ndeshjet gjysmëfinale takohen fitueset e Grupit A-D dhe fitueset e Grupit B-C.

Femrat

Gjysmëfinalet

Penza – Bashkimi

Prishtina – Trepça

Liga e Parë meshkujt

Istogu – Vëllaznimi

NEW Basket – Vushtrria