Presidenti i Federatës Italiane të Futbollit (FIGC), Gabriele Gravina, pranoi se nuk i kupton ata që pretendojnë se Italia duhej të kishte bojkotuar ndeshjen e fundit kundër Izraelit: “Duhej t’i dërgonim ne në Kupën e Botës?”
Gravina dha një përgjigje të qartë ndaj tifozëve që kërkonin që kombëtarja italiane të mos luante ndeshjen e fundit kundër Izraelit, të cilën “Azzurrët” e fituan 3-0.
Në Udine pati tension para ndeshjes, pasi një grup trazuesish sulmuan policinë jashtë stadiumit, pas një proteste paqësore që ishte zhvilluar në qendër të qytetit.
“Përplasjet nuk ishin paralajmëruar dhe u shkaktuan nga individë që nuk kishin lidhje me protestuesit pro-palestinezë. Më shumë ngjante si një grup i organizuar që donte vetëm të shkaktonte dëme,” tha Gravina në një konferencë për shtyp të enjten, sipas “TMË”.
“Besoj se ata që thanë se ndeshja nuk duhej të luhej, thanë një marrëzi të madhe. Duhej të humbnim ndeshjen në tavolinë, të merrnim penalizim me pikë dhe t’i dërgonim Izraelit në Kupën e Botës? Vërtet nuk e kuptoj këtë. Ne bëjmë futboll dhe duhet të bashkojmë njerëzit,” shtoi ai.
Vetëm 10,000 bileta u shitën për ndeshjen, ndërsa kapaciteti i stadiumit u ul nga 25,000 në 16,000 për arsye sigurie, por Gravina këmbënguli se atmosfera gjatë ndeshjes ishte ideale.
“Ambientin brenda stadiumit e karakterizonte gëzimi dhe qetësia. Kishte fitues dhe humbës, por ne gjithmonë kemi pasur marrëdhënie të mira me drejtuesit izraelitë,” tha ai.
“Ndoshta është një shenjë fati, por ndeshja u luajt menjëherë pas pezullimit të një konflikti që dukej i pafund.”
Gravina, i cili shërben gjithashtu si nënkryetar i UEFA-s, pranoi se organizata evropiane do të duhet të bëjë vlerësime në lidhje me formatin e kualifikueseve për Kupën e Botës.
“Nuk jam në dijeni për ndonjë ndryshim në format, dhe besoj se duhet të presim përfundimin e këtyre kualifikueseve për të nxjerrë mësime prej tyre,” përfundoi ai./GazetaExpress/
