Presidenti i Interit, Steven Zhang, e ka kritikuar ashpër presidentin e Serisë A, Paolo Dal Pino, për shkak të mënyrës se si ky i fundit është ballafaquar me krizën e koronavirusit.

Një numër i ndeshjeve të Serisë A, përfshirë këtu derbin e Italisë mes Interit dhe Juventusit, fillimisht ishin planifikuar të zhvilloheshin pa tifozë në stadium, para se të shtyheshin për t’u zhvilluar më vonë gjatë sezonit, transmeton Gazeta Express.

Tani, ndeshja e Interit kundër Juventusit supozohet se do të zhvillohet më 9 mars, që i bie të jetë e hënë, ndërsa edhe një xhiro shtesë do të zhvillohet më 12-14 maj. Interi s’është aspak i kënaqur me këtë vendim.

“Të luajmë rreth kalendarit dhe gjithmonë ta vendosim shëndetin publik në rend të dytë. Ti me siguri je palaçoja më i madh dhe më i zymtë që e kam parë ndonjëherë”, shkroi Zhang në Twitter.

“24 orë? 48 orë? 7 ditë? Çfarë tjetër? Cilët janë hapat e radhës? Tani ju na flisni për fair-play dhe frymë sportive? Si thua të mos i mbrojmë aspak lojtarët dhe trajnerët tanë dhe t’u kërkojmë atyre të luajnë nonstop, 24/7?”

“Por, po flas me ty, president Paolo Dal Pino. Turp të kesh! Është koha që të ngrihesh në këmbë dhe t’i marrësh përgjegjësitë e tua! Këtë e bëjmë ne në vitin 2020!”

“Të gjithë kudo në botë, nuk ka rëndësi nëse je tifoz i Inter, tifoz i Juventusit apo s’je tifoz fare, ju lutem keni kujdes! Kjo është gjëja më e rëndësishme për juve, për familjen tuaj dhe për shoqërinë tonë”.

Të dielën, përmes një dekreti të qeverisë, u bë e ditur se të gjitha eventet sportive në zonat e prekura nga koronavirusi janë suspenduar deri më 8 mars. /Gazeta Express/