Presidenti i Napolit, Aurelio De Laurentiis, ka reaguar ashpër ndaj UEFA-s dhe FIFA-s, duke kërkuar kompensim financiar për dëmtimet që lojtarët e tij pësojnë gjatë paraqitjeve me kombëtaret.
Shembulli më i fundit, sipas tij, është lëndimi i Amir Rrahmanit te Kosova.
De Laurentiis përmendi edhe mesfushorin Franck Anguisa, i cili u kthye i lënduar nga ndeshjet me Kamerunin, duke thënë se këto situata po dëmtojnë rëndë klubin.
“Rrahmani është kthyer i dëmtuar. Edhe Anguisa është kthyer i dëmtuar. Nuk mund të vazhdohet kështu,” deklaroi ai për mediat italiane.
Presidenti i Napolit kërkon reforma urgjente në futbollin ndërkombëtar. Ai propozon më pak ndeshje, më pak ekipe dhe sezon pa ndërprerje
Sipas tij, klubet duhet të kenë të drejtë të vendosin nëse lojtarët e tyre do të grumbullohen me kombëtaren, pasi ata paguhen nga klubet, shkruan Gazeta Express.
“Kur një lojtar dëmtohet me kombëtaren, duhet të hapet merkatoja dhe klubet të dëmshpërblehen. Por FIFA dhe UEFA duket se nuk e vlerësojnë fare rëndësinë e kampionateve kombëtare,” theksoi De Laurentiis. /GazetaExpress/
