FC Prishtina është bërë me trajner të ri.
Pas dorëheqjes së Afrim Tovërlanit, i cili u largua pas rezultateve katastrofale me Bardhekaltërit, kryeqytetasit e kanë zgjedhur menjëherë pasuesin e tij.
Alban Dragushës i është besuar roli i trajnerit të klubit më të madh në vend, shkruan “Gazeta Express”.
Lajmin e ka bërë të ditur klubi prishtinas, i cili i uroi mirëseardhje trajnerit të ri, duke shpresuar në sukses të përbashkët.
“Alban është emëruar trajneri i ri i skuadrës sonë. Trajneri 44-vjeçar vjen pas një periudhe të suksesshme te skuadra e Ramiz Sadikut, të cilën e ka drejtuar që nga korriku i vitit 2023. Nën udhëheqjen e tij, kjo skuadër u shndërrua në një nga befasitë më të këndshme të ligës së parë në këtë sezon.”
“Gjatë karrierës së tij si trajner, Dragusha ka drejtuar edhe ekipin e Vushtrrisë, ndërsa nga viti 2019 deri më 2022 ka qenë pjesë e stafit teknik si ndihmës trajner te Drita. Ai ka ndërtuar një karrierë të pasur edhe si futbollist, duke luajtur në disa vende si Ukraina, Azerbajxhani, Suedia, Shqipëria dhe Kosova. Klubi i uron trajnerit Dragusha mirëseardhje dhe shumë suksese në drejtimin e skuadrës bardhekaltër.”
Dragusha e ka udhëhequr me sukses Ramiz Sadikun në vitet e fundit dhe është i gatshëm për aventurën e re në Superligë.
FC Prishtina mbetet ende në garë për titull të kampionit, eventualisht për dalje në Evropë, përkundër rezultateve të tmerrshme me “Tokin”. /Gazeta Express
