Sigal Prishtina ka shënuar fitore bindëse ndaj Trepçës, në ndeshjen e vlefshme për javën e 18-të në Superligën e Kosovës në basketboll.
Ndeshja e zhvilluar sonte në palestrën “Minatori” përfundoi me rezultatin 53:88, shkruan Gazeta Express.
Më meritorët në fitoren e kryeqytetasve ishin Dardan Berisha, Derrick Wilson dhe Brooks Debisschop, që shënuan nga 15 pikë secili.
Te mitrovicasit u dallua Drilon Hajrizi me 19 pikë.
Për Prishtinën ishte kjo fitorja e 13-të në këtë sezon, krahas pesë humbjeve – kurse, Trepça tani numëron nëntë humbje, si dhe nëntë fitore.
Vlen të theksohet se kjo ndeshje u përcoll me incidente të krijuara nga tifozët mitrovicas, me ç’rast fundi i çerekut të tretë dhe komplet çereku i katërt u zhvillua pa praninë e tifozëve.
Deri te vendimi i gjyqtarëve për zbrazje të palestrës erdhi pasi tifozët vendas gjuajtën gjësende në parket. Ata nuk kursyen as fyerjet në kor ndaj Federatës së Basketbollit dhe kryetarit të saj, Arben Fetahut. /Gazeta Express/
