Superliga e basketbollit vazhdon sot me ndeshjet e xhiros së 16-të të saj, shkruan Gazeta Express.
Pas dueleve të djeshme, ku Peja e mundi Rahovecin ne derbi dhe Ponte Prizreni ishte më i mirë se Vëllaznimi, sot është koha për dy takimet të tjera.
Në fakt, nga ora 15:00 do të përballen rivalët e vjetër, por që gjenden në pjesën e poshtme të tabelës, Sigal Prishtina dhe Trepça.
Bardhekaltrit kanë katër fitore dhe 11 humbje, kurse mitrovicasit tri fitore dhe 12 humbje.
Kryeqytetasit renditen në vendin e gjashtë me pikë të njëjta me Vëllaznimin, që renditet i shtati, kurse Xehetarët janë në vendin e tetë.
Këtë ndeshje do të keni mundësi ta shikoni në televizionin T7.
E takimi i fundit është ai ndërmjet Golden Eagle Yllit dhe Bashkimit.
Therandasit në fundjavë e mposhtën Ponte Prizrenin, kurse Bashkimi pësoi nga Trepça.
Ekipi nga Suhareka kanë nëntë fitore dhe gjashtë humbje, ndërsa prizrenasit tetë fitore dhe shtatë humbje.
Kjo ndeshje fillon në orën 17:00 dhe atë e transmeton drejtpërdrejt platforma televizive Kujtesa përmes kanaleve të saj të sportit. /Gazeta Express/
