Prokuroria Themelore në Prizren tha se në bashkëpunim me Policinë ka iniciuar hetime me vetiniciativë për falsifikim të rezultateve zgjedhore në Dragash, duke intervistuar 51 persona, nga të cilët janë ndaluar 9 për 48 orë.

Ky veprim, u tha se erdhi "pas pranimit të informatave publike lidhur me procesin e rinumërimit të rezultateve të votimit, në Qendrën Komunale të Numërimit në Dragash" dhe "me autorizim të Kryeprokurorit të Prokurorisë Themelore në Prizren, Petrit Kryeziu".

"Pas autorizimit nga Prokuroria dhe në kuadër të këtij hetimi, janë intervistuar pesëdhjetë e një (51) të dyshuar. Nëntë (9) prej tyre pas intervistimit, me urdhër të Prokurorit të Shtetit, janë ndaluar për 48 orë, në cilësinë e kryesuesve të komisioneve, për shkak të dyshimit të bazuar se kanë kryer veprën penale “Falsifikimi i rezultateve të votimit” nga neni 216 par.2 të KPRK-së", thuhet në njoftimin e Prokurorisë.

Prokuroria Themelore në Prizren tha se "brenda afateve ligjore, do të vlerësojë parashtrimin e kërkesës lidhur me caktimin e masës për sigurimin e prezencës së të pandehurve në procedurë".

"Prokuroria Themelore në Prizren dhe Policia e Kosovës mbeten të përkushtuara në mbrojtjen e integritetit të procesit zgjedhor dhe të drejtës së votës së qytetarëve, në luftën kundër veprave penale që cenojnë zgjedhjet e lira dhe demokratike, si dhe në forcimin e sundimit të ligjit dhe vënien para drejtësisë të të gjithë atyre që veprojnë në kundërshtim me ligjin".