Prokuroria Themelore në Prishtinë ka lëshuar autorizim për Policia e Kosovës që të ndërmarrë veprime hetimore lidhur me pretendimet e ngritura nga ish-kryetari i Gjykatës Kushtetuese, Enver Hasani, në emisionin Betimi për Drejtësi.

Vendimi i Prokurorisë vjen një ditë pasi, më 25 shkurt 2026, Hasani deklaroi në këtë emision se për rastin e denoncuar nga ana e tij nuk ishte ftuar asnjëherë nga Prokuroria për të paraqitur provat që pretendon se posedon. I pyetur nëse ishte në dijeni për ndonjë vendim lidhur me rastin, ai u shpreh: “Kurrë. Është hera e parë që po dëgjoj për të”.

Sipas njoftimit zyrtar, autorizimi ndaj Policisë është dhënë me qëllim ndërmarrjen e veprimeve hetimore në përputhje me pretendimet e Hasanit, i cili ka deklaruar se disponon dëshmi lidhur me çështjen e denoncuar. Hetimet synojnë zbulimin e veprimeve të mundshme inkriminuese të personave të dyshuar dhe sigurimin e informatave dhe provave shtesë për zbardhjen e plotë të rastit.

Në intervistën e tij, Hasani ka përsëritur pretendimet se dekani i Fakultetit Juridik, Avni Puka, nuk e ka mbrojtur doktoratën në Universitetin “La Sapienza”, siç ka deklaruar para organeve të Fakultetit Juridik.

Ai ka theksuar se posedon prova të tjera që, sipas tij, “katërcipërisht vërtetojnë” se Puka nuk i ka përfunduar studimet e doktoratës në Fakultetin Juridik të Universitetit “La Sapienza”. Sipas Hasanit, diploma është nxjerrë në qarkullim pasi ai kishte deklaruar publikisht se Puka nuk i kishte përfunduar studimet e doktoratës.

Hasani ka shtuar se as Prokurori i Shtetit dhe as Këshilli i Etikës nuk kanë kompetencë për nostrifikimin e titujve shkencorë të fituar jashtë vendit, duke theksuar se këtë e bën vetëm NARIC-u në kuadër të MASHT-it. Ai ka pretenduar se kjo është arsyeja pse nuk është ftuar asnjëherë nga Prokuroria apo Këshilli i Etikës.

Pretendimet e Hasanit ishin cilësuar si shpifje nga Puka që në vitin 2022. Ai kishte deklaruar se doktoratura e tij është produkt i punës dhe përkushtimit disa vjeçar dhe se është e verifikuar nga komisione dhe mekanizma akademikë, duke paralajmëruar se do t’i drejtohej autoriteteve kompetente për të mbrojtur integritetin e tij.

Më 12 shkurt 2024, Këshilli i Etikës i Universitetit të Prishtinës kishte konstatuar, duke u bazuar në deklaratën e Universitetit të Romës “La Sapienza” dhe dokumentacionin e prezantuar, se doktorata e Pukës është e vlefshme dhe se punimi i tij është origjinal. Po ashtu, ishte konstatuar respektimi i kornizës normative dhe standardeve akademike në procedurën e avancimit të tij.

Pas këtij vendimi, Puka kishte deklaruar se asnjë sulm apo shpifje nuk e ka zmbrapsur në ushtrimin e detyrës si dekan, duke theksuar se do të përdorë të gjitha mjetet ligjore për t’u përballur me, siç i ka quajtur, akuza të pabazuara.

Ndërkohë, emisioni “Betimi për Drejtësi” ka tentuar të marrë një përgjigje të re nga Puka pas deklaratave të fundit të Hasanit, por deri në publikimin e artikullit nuk është kthyer përgjigje.

Prokuroria e Shtetit ka theksuar se mbetet e përkushtuar që çdo çështje ta trajtojë me profesionalizëm dhe në përputhje me legjislacionin në fuqi, me synimin për zbardhjen e plotë të rastit dhe arritjen e drejtësisë për të gjitha palët e përfshira.