Kryetari i Crystal Palace, Steve Parish, ka lënë të kuptohet se klubi do të preferonte ta humbiste Marc Guehin falas në fund të sezonit, sesa ta shiste në afatin kalimtar të janarit.

Ishte pikërisht Parish ai që anuloi kalimin e mbrojtësit te Liverpool për 35 milionë paund në ditën e fundit të merkatos, dhe tani ai ka shpjeguar qëndrimin e klubit.

Guehi ishte shumë pranë kalimit te Liverpool, përpara se Palace të ndryshonte mendje dhe të vendoste të mos shiste kapitenin pa gjetur një zëvendësues.

Ylli i Anglisë kishte shprehur dëshirën për të kaluar në “Anfield”, por pavarësisht kësaj, ai ka vazhduar të luajë në nivel të lartë për Palace këtë sezon.

Ai pritet të largohet nga Palace në vitin 2026, kur i skadon kontrata në verë, por destinacioni dhe data e saktë e largimit mbeten të paqarta.

Liverpooli është tashmë në garë me gjigantët evropianë Bayern Munich, Real Madrid dhe Barcelonën, të cilët kanë shprehur interes për të, por ende nuk është arritur asnjë marrëveshje.

Bayerni dhe klubet spanjolle kanë avantazhin që mund të bisedojnë me Guehin në janar për një transferim të lirë në korrik.

Dhe duket se Palace nuk është i interesuar të fitojë një shumë transferimi në fillim të vitit të ri, duke preferuar ta mbajë mbrojtësin deri në fund të sezonit 2025/26.

“Duhej ta mbanim Marcun, sepse diferenca mes një sezoni të shkëlqyer dhe një sezoni ku rrezikojmë rënien është nëse fitojmë pesë ndeshje më shumë apo jo,” tha Parish për “Men in Blazers”.

“Kufijtë në Premierligë janë shumë të ngushtë, dhe duhet të mbani mend që Michael [Olise] u largua, jemi mirë, Ebbs (Eberechi Eze) u largua, jemi mirë, Wilfred [Zaha] iku, jemi mirë. Por ka një kufi deri ku mund të vazhdosh ta bësh këtë pa e prishur strukturën e ekipit”, shtoi ai.

Liverpooli ka nevojë urgjente për përforcime në mbrojtje, pasi lojtari i afruar në verë, Giovanni Leoni, pësoi një dëmtim të ligamentit të gjurit (ACL).

“Të Kuqtë” kanë humbur gjashtë nga tetë ndeshjet e fundit në të gjitha kompeticionet, dhe ideja për të rikthyer interesin për Guehin në janar mund të jetë tërheqëse për trajnerin Arne Slot dhe drejtuesit e klubit.

Duke pasur parasysh bazën që kanë ndërtuar dhe dëshirën e Guehit për t’u bashkuar me ta, Liverpooli mbetet ende në pozitë të favorshme për 25-vjeçarin, por mund të pendohet për vendimin e Parishit në ditën e fundit të merkatos nëse një rival ndërhyn. “Ishte një vendim shumë i ngushtë,” shtoi Parish. “Marc u tregua shumë korrekt si person. Liverpooli bëri ofertën. Është një klub gjigant, dhe sigurisht që ai ishte i interesuar të shkonte atje. Por ai e pranoi vendimin me qetësi, nëse vendosnim ta mbanim. Sigurisht që tani topi është plotësisht në anën e tij si lojtar - ai ka mundësinë të zgjedhë vetë ku dëshiron të shkojë. Ishte një vendim shumë i vështirë, por besoj se ishte padyshim vendimi i duhur”, përfundoi ai./GazetaExpress/