Pronari i i faqes “JOQ Albania”, Gentian Çekeli, i ka bërë thirrje kryeministrit Edi Rama, që të tërhiqet nga lufta që ka nisur ndaj mediave. Ai bashkë me një koleg tjetër nga kjo faqe ishin gjahu i parë i kryeministrit Edi Rama, i cili u zotua se do të luftonte mediat, të cilat po i akuzon për disa nga pasojat e tërmetit.
Çekeli ka thënë se nuk frikësohet dhe ka shtuar se lufta ndaj mediave është e humbur gjithnjë.
“Edi Rama duhet të ndalojë luftën ndaj lirisë së mediave, pasi është konfirmuar shumë herë se kushdo që futet në këtë betejë do ta humb, sepse frika nuk më endet asnjëherë nëpër mend. E kam ëndërruar gjithmonë të shpallesha armik i partisë, por më shpallën në momentin më të keq të mundshëm. Atëherë kur duhet të raportonim dhe ndihmonim më shumë bashkëatdhetarët”, ka thënë Çekeli për reporteri.net.
Ai thekson se mediumi që është në pronësi të tij, punon në interes të qytetarëve dhe, sipas tij, do të jetë me qytetarët në çdo situatë. Çekeli beson se shteti duhet të merret me gjendjen në terren, dhe të mos përndjekë gazetarë që flasin të vërtetën.
“JOQ është zë i përhershëm opozitar dhe do ta mbrojë gjithmonë interesin e shqiptarëve kudo që ndodhen, duke u bërë zëri i tyre në çdo situatë. Aparati shtetëror bashkë me mediat pranë saj, mafian, portalet, disa vipa të shoëbizit dhe deri tek faqet e memeve është vënë në lëvizje kundër meje dhe njerëzve që flasin të vërtetën, duhet të fokusohet në përmirësimin e gjendjes në terren, pasi ka akoma njerëz që rrezikohen nga pallatet e çara”, ka shtuar Çekeli për Reporteri.net.
Ndërkohë, kur të gjithë menduan se Çekeli bashkë me një kolegun e tij ishin arrestuar, ai thotë se ishte duke darkuar me disa miq jashtë Shqipërisë kur mediat pranë qeverisë nxorrën “fake neës” për arrestimin e tij. Ai shton se po vazhdon të qëndrojë vërdallë duke ndihmuar njerëzit e prekur nga tërmeti që, siç thotë ai, kanë nevojë.
“Për vendndodhjen time janë në dijeni familja dhe kaq ka rëndësi. E rëndësishme është që unë jam vërdallë duke ndihmuar njerëzit në nevojë”, thekson në fund tiranasi.
Sidoqoftë, kryeministri Rama nuk është zmbrapsur nga qasja e tij kundër mediave, e madje sot e ka ashpërsuar gjuhën duke paralajmëruar se do të bëjnë atë që “s’ua rrok imagjinata”.
”Gjatë periudhës së gjendjes së jashtëzakonshme të fatkeqësisë natyrore, Japonia ka masa ekstreme për mediat private, që mesa duket edhe në Japoninë e urtësisë së vjetër, paskan qenë taksirat mbi taksiratin e madh të tërmetit! Mos na detyroni të bëjmë atë që s’ua rrok imagjinata!”, shkruajti sot kreu i Qeverisë.
Ndryshe, JOQ Albania është medium më opozitar në vend, duke u futur kështu në thumb të institucioneve. Së fundmi, shteti ka bllokuar aksesin në domanin e tyre në Republikën e Shqipërisë, mirëpo për këtë kanë reaguar gazetarë e politikanë, duke e konsideruar si shkelje e rëndë e lirisë së mediave.
